bügün 23-aprél...

türkiye awazi radiyosi: türkiye jumhuriyitining qurulushidiki eng chong qedem buningdin del 104 yil ilgiri tashlandi... türkiye büyük millet mejilisi (t b b m) yighin chaqirdi, anadolu urushtin emdila chiqqan bolup, harghin idi. türkiye büyük millet mejilisining échilishi bilen xelq mustapa kamal atatürkning rehberlikide öz teqdirini özi belgileshning qedimini tashlidi. shu lehzilerdin kéyin, igilik hoquqi shertsiz halda xelqke tewe idi.

23-aprél bir esirdin köprek waqittin buyan bir bayram süpitide tebriklenmekte.

ataturk bashtin-axir azadliqni mejlis we xelqning iradisi arqiliq qolgha keltürüshni oylaytti. u her bir herikitide xelqke wekillik qilidighan bir iradini qolgha keltürüsh üchün tirishatti. u hemishe: «pütün jahan shuni bilishi kérekki, buningdin kéyin bu milletning béshida mensep yoq, peqet birla küch bar, u bolsimu milliy igilik hoquqtur» deytti.

mustapa kamal atatürk xelqning teqdirini xelqning özi belgilishi kéreklikini yuqiridiki sözi arqiliq izahlaytti. u peqet birla hoquqning barliqini, u bolsimu xelqning qelbi we wijdani ikenlikini otturigha qoyatti.

türkiye büyük millet mejilisi 1920-yili 4-ayning 23-küni jüme namizidin kéyin xelqning duasi bilen échildi, 1921-yili 23-aprél bayram süpitide tebriklinishke bashlandi, 1929-yili 23-aprél mustapa kamal atatürk balilarni igilik hoquqning asasiy dep qarighanliqi üchün, bu bayramni balilargha hediye qildi. ene shu kündin buyan 23-aprél milliy igilik hoquq we balilar bayrimi süpitide tebriklinip kelmekte.