«5A-türksat» süniy hemrahi muweppeqiyetlik qoyup bérildi

türkiye awazi radiyosi xewiri: türkiyening 5-ewlad süniy hemrahi bolghan «5A-türksat», spéys éks (Space X) shirkitining 9-falkon rakétasi bilen alemge ewetildi. enqere waqti 4 tin 28 minut ötkende qoyup bérish, hawarayi sewebidin texminen bir saet kéchiktürülüp, 5 tin 15 minut ötkende emelge ashti.

türkiye qatnash ministiri adil karaismailoghlu türksatning enqere gölbéshidiki merkizide ötküzülgen yighinda, süniy hemrahning özining orbitasigha qarap heriket qilishni bashlighanliqini bildürüp: «35 minut ötkende 5A-türksat süniy hemrahidin tunji signal keldi. süniy hemrah sepirini dawamlashturuwatidu. bu seper töt ay dawamlishidu, andin sinaq qilishni bashlaymiz we süniy hemrah wezipisini bashlaydu» dédi.

u buningdin kéyin, 5B we6A  süniy hemrahliriningmu qoyup bérilidighanliqini bildürüp: «hazir yasilishi axirlashqan we sinaqliri qilinghan 5B süniy hemrahini iyun éyda qoyup bérishni pilan qiliwatimiz» dédi.

u yerlik we milliy «6A –türksat» süniy hemrahini yasash ishlirining dawamlishiwatqanlqini we 2022-yilining deslepki aylirida qoyup bérishni pilan qilghanliqlirini qeyt qildi.

u qolgha kelgen tereqqiyatlarning dawamida, alemge adem chiqirish pilanidin bésharet bérip, yéngi ewladlarning buninggha tolimu qiziqidighanliqini we aldimizdiki yillarda bularningmu emelge ashidighanliqini eskertti.

«5A-türksat» süniy hemrah orbitasidiki chastota we orbita heq-hoquqlirini 30 yilliq kapaletke ige qilidu. 31 gradus sherqiy orbitada türkiye, yawropa, ottura sherq, shimaliy afriqa, ottura gherbiy afriqa, jenubiy afriqa, aqdéngiz, ege déngizi we qara déngizni öz ichige alidighan keng jughrapiyede, téléwiziye pirogrammilirini tarqitish we xewerlishish xizmitini béridu. süniy hemrah orbitasigha yétip bérish üchün töt ay seper qilip, bu yil (2021) ning ikkinchi charikide xizmitini bashlaydu.