b d t, yawropa ittipaqi we dunya sehiye teshkilati israiliyeni agahlandurdi
birleshken döletler teshkilati, yawropa ittipaqi we dunya sehiye teshkilati israiliyeni pelestinning refah rayonigha kirmesliki toghriliq agahlandurdi.
türkiye awazi radiyosi xewiri: israiliye bash ministiri binyamin nétanyahuning «kélishim hasil qilinghan yaki qilinmighan bolushidin qetiynezer refahqa kirimiz (hujum bashlaymiz)» dep bayanat élan qilghandin kéyin, birleshken döletler teshkilati bash katipi antoniyo gutérrés, dunya sehiye teshkilati bash katipi tédros gébréyus, yawropa komitétniing muawin reisi, yawropa ittipaqi tashqi munasiwetler we xewpsizlik siyasetliri ali wekili josép borrél israiliyeni agahlandurdi.
mezkur rehberler refahqa qarshi élip bérilidighan herbiy heriketning nahayiti chong «balayiapet» ni keltürüp chiqiridighanliqini qayta tekitlidi.
birleshken döletler teshkilati bash katipi antoniyo gutérrés mundaq dédi:
«refahqa qarita élip bérilghusi herbiy heriket minglarche puqraning ölüp kétishige seweb bolidighan, yüz minglarche puqrani qéchishqa mejbur qilidighan éghir aqiwetni keltürüp chiqiridu. derweqe, bu ghezzediki pelestinliklerge éghir tesir körsitidu, shundaqla ishghaliyet astidiki iyordan deryasining gherbiy qirghiqi we téximu keng rayonlargha éghir talapetlerni yetküzidu.»
dunya sehiye teshkilati bash katipi tédros gébréyus israiliyeni refahqa kirmeslik toghriliq agahlandurup mundaq dédi:
«refahqa keng kölemlik hujum qozghashning aqiwéti insaniy tiragédiye bolidu.»
yawropa komitétniing muawin reisi, yawropa ittipaqi tashqi munasiwetler we xewpsizlik siyasetliri ali wekili josép borrél mundaq dédi:
«hamasning yoqitilishining bedili minglighan puqralarning ölümi bolmasliqi kérek. yene bir milyondin artuq mudapiesiz halettiki kishilerning yurt – makanliridin ayrilip qiélishi éghir aqiwetlerni keltürüp chiqiridu. israiliye hökümitini xelqara jemiyetning chaqiriqigha qulaq sélip, (kirizisni) siyasiy (yollar arqiliq hel qilish nishan qilinghan) tinchliq musapisige qaytishqa chaqirimiz.»
israiliye bash ministiri binyamin nétanyahu pelestin qarshiliq körsitish herikiti hamas bilen kélishim hasil qilinghan-qilinmighan bolushidin qetiynezer, refah rayonigha herbiy heriket qozghaydighanliqlirini bildürgenidi.
igilinishiche, israiliye armiyesi 7-öktebirdin buyan hujumlirini dawamlashturuwatqan ghezze rayonida hayatidin ayrilghanlarning sani 34 ming 596 ge yetken.
