hamas siyasiy béyrusi bashliqi ismail heniyye erdoghanni medhiyelidi

türkiye awazi radiyosi xewiri: hamas siyasiy béyrusi bashliqi ismail heniyye, «(jumhur reis rejep tayyip) erdoghanning pelestin mesilisi toghrisidiki bayanati, pelestinni özlirining dewasi dep qaraydighan we ghezzediki zulumgha qarshi turghan barliq türkiye xelqining wijdanini ekis ettürüp berdi» dédi.

heniyye erdoghanning pelestin dewasigha qilghan yardemlirini medhiyelep: «jumhur reis erdoghanning shundaqla adalet we tereqqiyat partiyesining parlamént guruppa yighinida élan qilghan bayanati, hamasni milliy azadliq herikiti dep izahlighan hemde uni <quwwaiy milliye> (yeni türkiyening azadliq herikiti teshkilati) gha oxshatqan éniqlimisi, shübhisizki bizge nisbeten we pelestin xelqige nisbeten iptixarlinish menbesidur. türkiyening rayondiki orni, rayon xaraktérliq we xelqaraliq siyasiti, pelestin dewasigha we ghezzege qaratqan pozitsiyesini yéqindin közetmektimiz. türkiye xelqining ghezzediki qorshawni bikar qilish üchün mawi marmara paraxotida qandaq shéhit qilinghanliqi we qandaq qurbanliqlarni bergenliki hazirmu ésimizde» dédi.

erdoghan bilen ötküzgen uchrishishta israiliyege qaratqan soda cheklimisiningmu muzakire qilinghanliqini eskertken heniyye, bu qararning musulmanlarning muqeddes makanlirini, bolupmu eleqsa mesjidi we quddustiki muqeddes jaylarni ayaq asti qilghan zionist düshmenlerge qarshi sel qarighili bolmaydighan muhim bir qedem ikenlikini tekitlidi.

ismail heniyye jumhur reis erdoghan we türkiye xelqining pelestin dewasigha qarita pikriy, tarixiy we siyasiy pozitsiyesige medhiye oqup, «biz erdoghanning birleshken döletler teshkilatida pelestinning xeritisini körsitip, zéminimizning qandaq ishghal qilinghanliqini chüshendürgenlikini we (israiliyening sabiq  prézidéntliridin) shimon pérés qa qayturghan jawabini hélimu eslep turmaqtimiz» dédi.

ismail heniyye ghezzeni bashqurushqa munasiwetlik bezi tallashlarning otturigha qoyulghanliqini, emma buning muweppeqiyetlik bolishi mumkin emeslikini tilgha élip, «ghezze pelestinlikler teripidin bashqurulidu. hamas ghezzeni bashqurushta birdin bir söz igisi bolushta ching turmaydu. emma biz ortaqliq asasida birleshme hökümet quralaymiz we ghezzening bashqurilishi toghrisida kélisheleymiz.  bular milliy mesililerdur,. ghezzede, gherbiy qirghaqta yaki her ikkiside ne ishghaliyetchilerning, ne bashqilarning weziyetni tengshigüchi bolishigha yol qoymaymiz» dédi.

israiliyening rafahqa qaratqan tehditi toghrisidimu toxtalghan ismail heniyye: «biz rafahqa bésip kirishtin agahlandurimiz, chünki bu pelestin xelqige qarshi chong bir qirghinchiliqqa yol échishi mumkin. biz barliq qérindash döletlerni, misirdiki we türkiyediki qérindashlirimizni, muressechi qatardiki qérindashlirimizni shundaqla hem  yawropa döletlirini (israiliye) ning tajawuzchiliqini chekleshke chaqirimiz. hem rafahqa bésip kirishini tosup qilish üchün, hem (israiliye armiyisi) ning ghezzedin toluq chikinishi we ghezzege qiliniwatqan hujumlarning axirilishishi üchün heriketke ötüshke chaqirimen» dédi.

ismail heniyye hamasning muzakirilerde élastikiliqni namayan qilghanliqini, israiliyening bolsa, muressesiz pozitsiyede bolghanlilqini eskertip, muzakirilerning üzülüp qilishining we meghlup bolishining jawabkarliqining (israiliyening) muressesiz pozitsiyeside ikenlikini tekitlidi.