йавропа түркийә билән болған мунасивәтләрни илгири сүрүшкә әһмийәт беридиғанлиқини тәкитлиди

түркийә авази радийоси хәвири: белгийәниң пайтәхти бирйусселда давамлишиватқан йавропа иттипақи башлиқлар йиғининиң хуласә доклатиниң түркийә билән болған мунасивәтләргә алақидар бөлүми елан қилинди.

байанатта: «йавропа иттипақиниң шәрқий ақдеңизниң муқим вә бихәтәрлики һәмдә түркийә билән болған һәмкарлиқ вә өзара мәнпәәт йәткүзүш мунасивитини тәрәққий қилдурушта истратегийәлик мәнпәәти бар» дегән ибариләргә орун берилди.

байанатта йәнә: «йавропа иттипақи түркийә билән болған һәмкарлиқниму илгири сүридиған қибрис сөһбәтлириниң әслигә келиши вә илгирилишигә интайин әһмийәт бериду» дейилди.

йавропа иттипақиниң бу мәсилини һәл қилишта бирләшкән дөләтләр тәшкилати (б д т) һимайисидики мусапини қоллайдиғанлиқи тәкитләнгән байанатта: «йавропа иттипақи қолидки барлиқ мувапиқ васитиләрни ишқа селип, б д т һимайисидики барлиқ басқучларни қоллашқа тәййар» дейилди.

йавропа иттипақи кеңиши рәиси чарлез мишел байанат берип: «биз түркийә билән иҗабий мунасивәт орнитишни, муқим мунасивәтләрни тәрәққий қилдурушни халаймиз... мән қибрис вәзийитиниң интайин муһимлиқини тәкитлимәкчимән. биз қибрисниң әһвалиға, болупму б д т ниң һәл қилиш мусаписигә алаһидә қизиқимиз» дегәнләрни қәйт қилди.