pelestin: mesuliyet amérikada
pelestin hökümiti isirailiyening ghezze we gherbiy qirghaqta pelestin xelqige qiliwatqan hujumlirini toxtitish mesuliyitining amérika hökümitide ikenlikini bildürdi.
türkiye awazi radiyosi xewiri: pelestin wafa agéntliqining bildürüshiche, uchur-alaqe ishliri ministiri we hökümet bayanatchisi nebil ebu rudeyne isirailiyening pelestin xelqige hujum qilishni dawamlashturup, özidin hésab sorashtin ajiz kéliwatqan xelqara jemiyetke heywe qiliwatqanliqini éytqan.
u isirailiye küchlirining pelestin xelqige qaratqan hujumlirini dawamlashturushining, pütkül rayonda urush partlishigha seweb bolidighanliqi toghrisida agahlandurdi.
u mundaq dédi:
«xewpsizlik we muqimliq birsi üchün kapaletke ige qilinmaydu, isirailiyening azghunluqining bedilini hemme kishi töleydu.»
u isirailiyening ghezzede irqiy qirghinchiliq urushini, ishghal astidiki gherbiy qirghaq we sherqiy quddusta qetliam, tutqun qilishni dawamlashturuwatqanliqini, musulman we xiristiyanlarning muqeddes meniwiyetlirige xilapliq qiliwatqanliqini tekitlidi.
u isirailiye dairilirini toxtashqa mejburlash üchün amérika bashchiliqidiki xelqaraliq jemiyetning heriketke ötüshi kéreklikini eskertti.
u: «amérika hökümitining zimmiside xelqimizge qiliniwatqan hujumlarni toxtitish mesuliyiti bar. amérika hökümitining isirailiyeni urushni toxtitishqa mejburlashni we refahta xelqni köchüshke mejburlashtin kélip chiqidighan xeterning aldini élishni xalimasliqi, rayon muqimliqi we bixeterlikige ziyanliq. zorawanliqning axirlishishi, tinchliq, bixeterlik we muqimliqni kapaletke ige qilish, peqet we peqet pelestin xelqi qanuniy heq-hoquqlirini qolgha keltürüp, musteqil pelestin döliti qurulghanda emelge ashidu. héchkim qéchip qutulalmaydighan zorawanliq we ölüm dewrining dawamlashmasliqi üchün, erebler amérika bilen birlikte heriketke ötüshi, amérika hökümiti urushni toxtitish, köchüshke mejburlashning aldini élish üchün muhim qarar élishi kérek» dédi.
