amérika bilen engliye hudeyde bombardimanini köpeytti
yemende iran qollawatqan xusiylar amérika bilen engliyening hudeyde shehirini besh qétim hawadin bombardiman qilghanliqini élan qildi.
türkiye awazi radiyosi xewiri: xusiylarning «elmesire» téléwiziyesi amérika we engliye ayropilanlirining hudeyde shehirige qarashliq essalif nahiyesining rasisa rayonini besh qétim bombardiman qilghanliqini xewer qildi.
xewerde, bombardimanda ölüm-yétim hadisisi körülüp-körülmigenliki toghrisida melumat bérilmidi.
hudeyde uzun déngiz qirghiqigha ige bolup, sheherde istratégiyelik ehmiyetke ige üch port bar. bu üch portning biri xusiylar kontrol qiliwatqan essalif rayonida.
amérika bilen engliye xusiylarning qizil déngizda isirailiye paraxotliri we ittipaqdashlirini nishan qilghan hujumlirigha jawaben hudeyde shehirige qaratqan heriketlirini köpeytti.
xusiylar 25-féwral (2024) amérika we engliye ayropilanlirining sanaani öz ichige alghan üch sheherge 25 qétim hawa hujumi qilghanliqini, hujumlarda bir kishining jénidin ayrilip, alte kishining yarilanghanliqini élan qilghan idi.
yemende iranning qollishi astidiki xusiylar 31-öktebir (2023) din tartip isirailiyening ghezzediki hujumlirigha jawab qayturushni seweb qilip, yemen déngiz tewelikide isirailiye shirketlirige chétishliqi barliqini ilgiri sürgen soda paraxotlirini musadire qilishni, bezilirige uchqu we bashqurulidighan bombilar bilen hujum qilishni bashlighan idi.
amérika herbiy qisimliri nurghun qétim yemendin étilghan bashqurulidighan bomba we uchqularning étip chüshürülgenlikini élan qilghan idi.
nurghun xelqaraliq déngiz tiransport shirketliri xusiylarning hujumliri sewebidin qizil déngizdiki paraxot qatnishini bikar qildi.
dunya sodisining texminen %12 i aqdéngizni qizil déngizgha tutashturup, yawropa bilen asiya otturisidiki musapini qisqartidighan süweyish qanili arqiliq emelge ashidu.
