xitay amérikaning émbargo qararigha naraziliq bildürdi

türkiye awazi radiyosi xewiri: xitay soda ministirliqi bayanat élan qilip, washingtonning chégra halqip bir tereplime émbargolar arqiliq jazalash hoquqi yürgüzüwatqanliqini we bu qararning «iqtisadiy zomigerlikning tipik misali» ikenlikini otturigha qoydi.

bayanatta, xitayning zörür tedbirlerni qollinip, xitay shirketlirining qanunluq hoquqi we menpeetini qoghdaydighanliqi qeyt qilindi.

xitay tashqi ishlar ministirliqi bayanatchisi maw ning paytext béyjingda ötküzülgen muxbirlarni kütüwélish yighinida, xitayning ukraina kirizisida obyéktip we biterep pozitsiyede bolup kelgenlikini, tinchliq söhbiti ötküzüshke righbetlendürüshni we kirizisqa siyasiy chare tépishqa tirishiwatqanliqini bildürdi.

u xitay bilen rusiyening normal soda we iqtisadiy hemkarliqining ne üchinchi terepni ziyangha uchritishni nishan qilmaydighanliqini, ne üchinchi terepning arilishishigha yol qoymaydighanliqini tekitlep, bu sewebtin béyjingning xitay shirketlirige qanunsiz jaza yürgüzüshke qarshi turidighanliqini bildürdi.

amérika 23- féwral (2024) rusiye-ukraina urushi bashlanghanliqining ikkinchi yilliqi harpisida, xitayning 9 shirkitini ukraina urushida rusiyege herbiy jehettin yardemchi bolidighan mehsulatlarning sodisini qilidighanliqini ilgiri sürüp jaza tizimlikige kirgüzdi we 8 shirketke éksport cheklimisi qoydi.