putin: biz alemge yadro qorali orunlashturushqa qarshi

ürkiye awazi radiyosi xewiri: rusiye pirézidénti wladimir putin moskwada dölet mudapie ministiri sérgéy shoygu bilen yighin ötküzgendin kéyin, bayanat élan qildi.

u rusiye armiyesining donétsk rayonidiki awdiyiwka shehirini «muweppeqiyetlik halda» qolgha kirgüzgenlikini eskertip, krinki dep atilidighan turalghu rayoniningmu kontrolluq astigha élinghanliqini qeyt qildi.

u ukraina mesiliside muzakire ötküzüshni ret qilmighanliqlirini bildürüp: «biz her qachan muzakire ötküzüshni qollap kelduq. diyalogni üzmigenlikimizni yüzlerche qétim éyttim. eslide ukraina london bilen washingtonning biwaste yolyoruqi bilen diyalogni toxtitip qoydi» dédi.

u amérika taratqulirida élan qilinghan «rusiye alemge yadro qorali orunlashturushni pilanlawatidu» dégen xewerler üstide toxtilip, mundaq dédi:

«bizning meydanimiz nahayiti roshen we ochuq-ashkara. alemge yadro qorali orunlashturushqa bashtin-axir qarshi turup kelduq. bu sahede tüzülgen barliq kélishimlerge boysunushnila emes, belki ortaq birlikte ishlinidighan xizmetlerni kücheytishni bir qanche qétim teklip qilduq.»

dölet mudapie ministiri sérgéy shoygu rusiyening alemge yadro qorali orunlashturush pilan-layihesining yoqluqini tekitlep: «buni ularmu (amérika) bilidu, shundaqtimu warang-churung peyda qiliwatidu. peqet ukraina üchünla emes, belki rusiyeni istratégiyelik jehettin yingish üchün awam palata we kéngesh palata ezalirini qorqitip, xamchot ajritishni xalaydu» dédi.