emine erdoghan ghezzediki yétim balilarni türkiyede kütüshke teyyar ikenlikini bildürdi
jumhur reis rejep tayyip erdoghanning ayali emine erdoghan türkiyening ghezze rayonida uzun muddetlik urush toxtitish we normallishish emelge ashurulghangha qeder ghezzediki ige -chaqisiz we yétim balilarni kütüshke teyyar ikenliklirini bildürdi.
türkiye awazi radiyosi xewiri: jumhur reis erdoghanning resmiy uchrishishliri dairiside misir paytexti qahirege birlikte barghan ayali emine erdoghan pirézidént abdulfettah esisining ayali éntisar amer bilen körüshti.
uchrishishita, ghezzege qiliniwatqan yardemlerni kéngeytish we insanperwerlik kirizisini hel qilish meqsitide qilishqa bolidighan ishlar muzakire qilindi. bolupmu israiliyening wehshiyane hujumliri astidiki ghezzede insaniy pajielerning éghir tesirige uchrighan yétim balilargha qarita tashlinishi pilanlanghan qedemler muzakire qilindi.
emine erdoghan rayonda uzun muddetlik urush toxtitish we normallishish emelge ashurulghangha qeder ghezzediki yétim balilarni waqitliq kütüwélishqa teyyar ikenliklirini bildürdi.
emine erdoghan barliq döletlerning ghezze üchün küch chiqirishi kéreklikini tekitlidi.
pirézidént abdulfettah esisining ayali éntisar amermu noyabirda emine erdoghanning sahibxanliqida ötküzülgen «pelestin üchün bir yürek rehberler yighini» munasiwiti bilen emine erdoghanni tebriklidi.
uchrishitin kéyin, emine erdoghan éntisar amer bilen birlikte israiliyening 7-öktebir (2023) de ghezzege qaratqan hujumlirining deslepki saetliridin étibaren ghezze we misir otturisidiki refah chégra éghizida xalisane yardem paaliyetlirini élip barghan misir qizilay jemiyiti bilen hayat karima – ghururluq turmush fondi jemiyitini ziyaret qildi.
emine erdoghan misir qizilay jemiyitining paaliyetliri we ghezze üchün teshkillengen yardemler heqqide melumat aldi.
