исраилийәниң қирғинчилиқи хәлқара җинайи ишлар сотиниң қарарини айағ асти қилғанлиқтур

түркийә авази радийоси хәвири: һамас исраилийәниң «бихәтәр район»  дегән йалғинини елгири сүрүп, хәлқни қоғлап чиқарған ғәззәниң җәнубидики рәфаһ шәһиридә кечидә елип барған қирғинчилиқиниң, әслидә пәләстинликләргә ирқий қизғинчилиқ йүргүзүш вә мәҗбурий йуртлиридин көчүрүш урушиниң давами икәнликини билдүрди.

һамас сийасий бийуроси әзаси иззәт әрришк исраилийәниң рәфаһ шәһридә 100 дин артуқ пәләстинлик өлтүрүлгән һуҗумлири һәққидә байанат елан қилди.

иззәт әрришк һамасниң иҗтимаий таратқу бетидә елан қилған байанатида: «ишғалийәтчи исраилийәниң рәфаһта бүгүн кәчтә 100 дин артуқ кишини шеһит қилған қирғинчилиқи, пәләстинликләргә ирқий қизғинчилиқ йүргүзүш вә мәҗбурий йуртлиридин көчүрүш урушиниң давамидур» деди.

иззәт әрришк исраилийәниң рәфаһқа қилған һуҗуминиң бенйамин нетанйаһу һөкүмитиниң «ирқий қирғинчилиқ» дәп қарилидиған һәр қандақ қәдимини тохтитишқа даир хәлқара җинайи ишлар сотиниң муһим чарә-тәдбир елиш қарарини айағ асти қилғанлиқини испатлап бәргәнликини тәкитләп: «түнүгүн нетанйаһуға йаққан йешил чирағ вә униң ирқий қирғинчилиқ урушини давамлаштуруши үчүн очуқ-ашкара бәргән йардәмлири сәвәбидин (америка пирезиденти җо) байдин һөкүмитиму нетанйаһу һөкүмити билән бирликтә рәфаһ қирғинчилиқиниң толуқ җавабкари һесаблиниду» деди.

исраилийәниң пуқраларға қаратқан ирқий қирғинчилиқ җинайитиниң тохтитилиши керәкликини тәләп қилған иззәт әрришк: «әрәб иттипақи, ислам һәмкарлиқ тәшкилати вә бирләшкән дөләтләр тәшкилати хәвпсизлик кеңишини ғәззә районидики мудапиәсиз пуқраларға қарши сийонистларниң таҗавузчилиқи, шундақла давамлишиватқан ирқий қирғинчилиқ җинайитини тохтитиш үчүн, җиддий һәмдә әстайидил һәрикәт қилишқа чақиримиз» деди.