hamas: ramka kélishimi toghrisidiki jawabimizni qatar bilen misirgha melum qilduq

türkiye awazi radiyosi xewiri: hamas yazma bayanat élan qilip, «hamas ramka kélishimige munasiwetlik jawabini misir bilen qatarliq qérindashlirigha yetküzdi؛ hamas keng dairilik urush toxtitishqa toluq kapaletlik qilish, xelqimizge qiliniwatqan hujumlargha xatime bérish, ghezze muhasirisini bikar qilip, uning güllinishige kapaletlik qilish shundaqla esir almashturush musapisini axirlashturush xaraktéridiki mezkur teklipke ijabi qaridi» dégenlerni qeyt qildi.

bayanatta yene, qatar, misir we israiliyening ghezzege qaratqan hujumlirini toxtitish üchün küch chiqarghan bashqa döletlerge minnetdarliq bildürüldi.

israiliye hamasning ghezzediki terepler otturisida muzakire qilinghan urush toxtitish teklipige qayturghan inkasining  qatar arqiliq mosad (istixbarat orgini)qa yetküzülüp, etrapliq muhakime qilinghanliqini uqturdi.

qatar bash ministiri, qoshumche tashqi ishlar ministiri muhemmed bin abdurrahman al sani 28-yanwar washingtonda bergen bayanati jeryanida, amérika, israiliye, misir we qatar wekillirining firansiye paytexti parizhda ghezzede urush toxtitish élan qilish we esir almashturush mesililiri toghrisida söhbet ötküzgenlikini bildürgenidi.

pelestin islamiy qarshiliq körsitish herikiti — hamasning herbiy qaniti bolghan qessam birigadasi 7-öktebir israiliyege «eqsa topani» namliq keng kölemlik hujum qozghighanliqini jakarlighan. arqidin israiliye armiyesi urush ayropilanliri bilen ghezzege qarshi «tömür qilichlar» herikiti qozghighanliqini élan qilghanidi.

künséri keskinlishiwatqan toqunushlar netijiside, köp sanliqi balilar we ayallar bolup, jemiy 28 mingdin artuq pelestinlik qaza qildi.