yawropa ittipaqi baldurraq türkiye bilen bolghan hemkarliqni chongqurlashturushni xalaydu

türkiye awazi radiyosi xewiri: yawropa ittipaqi döletlirining diplomatiye ministirliri bélgiyening paytexti biryussélda ötküzülgen gheyri resmiy qerellik yighinida bir yerge jem boldi.

yighinning küntertiptiki témiliridin  birsi türkiye bilen bolghan munasiwet bolup, yawropa ittipaqi tashqi ishlar we bixeterlik siyasiti aliy wekili josép borrél we yawropa ittipaqining nöwetchi reisi bélgiye tashqi ishlar ministiri hadja lahbib metbuatlargha birleshme bayanat élan qildi.

josép borrél: «barliq eza döletler türkiye bilen téximu qoyuq munasiwet ornitishqa qoshuldi» dédi.

yawropa ittipaqi tashqi ishlar we bixeterlik siyasiti aliy wekili josép borrél yene: «toqunushtin saqlinish we hemkarliqni ashurush üchün qibris mesilisini nezerde tutqan halda, türkiye bilen alaqilishishimiz kérek. türkiye bilen téximu köp munasiwet ornitishimiz, menpeetimiz bir-birige mas kélidighan sahelerde birlikte xizmet qilishimiz we bizni bir-birimizdin yiraqlashturidighan mesililerdin saqlinishimiz kérek» dédi.

yawropa ittipaqining wizini békar qilish qatarliq mesililerde ilgirileshke teyyar yaki emesliki toghrisidiki soalgha jawab bergen borrél: «türkiye bilen téximu küchlük munasiwet ornitishimiz kérekliki heqqide hemmylen birdek pikirge ige. emma bu tereqqiyatlarning musapisige baghliq bolidu. wiza mesiliside néme bolidighanliqini éniq bilmeymen. bügün bu mesile muzakire qilinmidi» dédi.

bélgiye tashqi ishlar ministiri lahbibmu: «türkiye dunya sehniside barghansiri  téximu muhim istratégiyelik shérikke ayliniwatidu» dédi.

«türkiye kem bolsa bolmaydighan shériktur» dégen lahbib yawropa ittipaqigha eza 10 dölet qatnashqan 2004 -yilliq kéngiyishning 20 - yilliqini tebriklesh üchün aprélda ötküzülidighan paaliyetlerge türkiyenimu teklip qilidighanliqini bildürdi.