israiliyelikler ghezzediki qirghinchiliqini qollaydiken
texminen %90 israiliyelik israiliye qisimlirining ghezze rayonida qiliwatqan qirghinchiliqini yolluq dep qaraydiken.
türkiye awazi radiyosi xewiri: israiliyening 7 - öktebir (2023) din buyan ghezze rayonigha qiliwatqan hujumida kem dégende 11 ming kichik bala we 7 ming 500 ayalni qoshqanda, jemiy 26 ming 422 pelestinlik öltürülgen bir peytte, tél awiw uniwérsitéti teripidin élip bérilghan ray sinashqa asaslanghanda, israiliyeliklerning bu qirghinchiliqni qollash nisbiti xélila yuqiri iken.
tél awiw uniwérsitéti 605 israiliyelik bilen 8-yanwardin 15-yanwarghiche bolghan ariliqta israiliyening ghezze rayonidiki hujumigha qarita ray sinash élip barghan.
ray sinashqa qatnashqan israiliyeliklerning %90 ke yéqini israiliye qisimlirining ghezzediki pelestinliklerni «toluq yaki qismen yolluq» seweb bilen öltürgen yaki yaridar qilghanliqini otturigha qoyghan. texminen%53 israiliyelik qorshaw astidiki ghezze rayonida qanunsiz yehudiylar olturaq rayoni qurushni qollaydighanliqini bildürgen.
ray sinashqa qatnashqanlarning %58.5 i ghezze rayonini kontrol qilish hoquqining israiliyening qolida bolushi kéreklikini, %27.1 i bolsa, xelqaraliq bir küchning qolida bolushi kéreklikini, %5.8 i pelestin hökümitining kontrolluqni qoligha élishi kéreklikini otturigha qoyghan. %27 israiliyelik musteqil pelestin dölitining qurulushini qollaydighanliqini bildürgen bolsa, %66 israiliyelik bu pikirge qarshi turidighanliqini bildürgen.
ray sinashqa qatnashqan israiliyeliklerning yérimidin köpreki israiliye qisimlirining hujumida «muwapiq küch» ishletkenlikini, %43.4 i bolsa, israiliye qisimlirining «bek az küch» ishletkenlikini otturigha qoyghan.
