ئامېرىكا شىۋېتسىيەنىڭ ئىلتىماسىنىڭ تەستىقلانغانلىقىدىن مەمنۇن ئىكەنلىكىنى بىلدۈردى

تۈركىيە ئاۋازى رادىيوسى خەۋىرى: ئامېرىكا تاشقى ئىشلار مىنىستىرى ئانتونى بلىنكېن ئېكس (X) ئادرېسىدا ھەمبەھرلىگەن ئۇچۇرىدا: «تۈركىيە جۇمھۇر رەئىسى ئەردوغاننىڭ شىۋېتسىيەنىڭ ناتوغا كىرىش ئىلتىماسىنى تەستىقلىغانلىقىنى خۇشاللىق بىلەن قارشى ئالىمىز» دېدى.

ئۇ ئۇچۇرىدا يەنە، شىۋېتسىيەنىڭ ناتوغا ئەزا بولۇش ھۆججەتلىرىنىڭ ۋاشىنگتونغا يەتكۈزۈلۈشىنى ۋە ناتونىڭ 32-ئەزاسى بولۇشىنى تەقەززالىق بىلەن كۈتۈۋاتقانلىقلىرىنى ئەسكەرتىپ: «شىۋېتسىيە ۋە ئىتتىپاق بىرلىكتە تېخىمۇ كۈچلۈك بولىدۇ» دېدى.

تۈركىيە جۇمھۇر رەئىسلىك مەھكىمىسى ئۇچۇر-ئالاقە ئىشلىرى ئىدارىسىنىڭ ئېكس ئادرېسىدا تۈنۈگۈن (25-يانۋار) ئېلان قىلىنغان باياناتىدا، «جۇمھۇر رەئىس رەجەپ تاييىپ ئەردوغان شىۋېتسىيەنىڭ ناتوغا ئەزا بولۇش ئىلتىماسىغا مۇناسىۋەتلىك بۈيۈك مىللەت مەجلىسىدە قوبۇل قىلىنغان قانۇننى ئېلان قىلىش توغرىسىدا پەرمان چۈشۈردى ۋە شىۋېتسىيەنىڭ ناتوغا ئەزا بولۇش كېلىشىمىنى تەستىقلىدى» دېيلگەن ئىدى.

تۈنۈگۈن رەجەپ تاييىپ ئەردوغاننىڭ پەرمانى رەسمىي گېزىتتە ئېلان قىلىنغان ئىدى.