husiylar: amérikaning bir herbiy paraxotigha zerbe berduq
yemende iranning qollishi astidiki husiylar eden boghuzi we babulmendeb boghuzida, amérikaning bir herbiy paraxotigha zerbe bérip, ikki soda paraxotini qaytip kétishke mejbur qilghanliqini élan qildi.
türkiye awazi radiyosi xewiri: yemendiki husiylarning armiye bayanatchisi yehya seri hem ghezzeni qollash hemde amérika we engliyening yemenge qiliwatqan hujumlirigha jawab qayturush meqsitide, eden boghuzi bilen babulmendeb boghuzida, amérika herbiy paraxotigha zerbe bergenliklirini ilgiri sürdi.
u rayonda soda paraxotlirini qoghdawatqan amérika herbiy paraxotliri bilen chiqqan étishishlarning ikki saettin artuq dawamlashqanliqini eskertip: «amérika herbiy paraxotidin birige zerber berduq, ikki soda paraxotini keynige qaytishqa mejbur qilduq» dédi.
u amérika herbiy paraxotigha bashqurulidighan bombilar bilen zerbe bérilgenlikini, herbiy paraxotlar bashqurulidighan bombilarni tosushqa urunghan bolsimu, emma bezi bombilarning nishangha del tegkenlikini ilgiri sürdi.
u sözide, qizil déngizda hujumlarning dawamlishidighanliqini qeyt qildi.
amérika merkiziy armiye qomandanliq ishtabi-séntkom (CENTCOM) husiylarning shu yer waqti 14.00 etrapida eden boghuzida ilgirilewatqan amérka bayriqi ésilghan soda yük paraxotigha qaritip üch dane bashqurulidighan bomba atqanliqini élan qilghan idi.
séntkom ikki bashqurulidighan bombining «USS Gravely» herbiy paraxoti teripidin hawada pachaqlanghanliqini, birining déngizgha chüshkenlikini bildürgen idi.
yemende iranning qollishi astidiki husiylar 31-öktebir (2023) din tartip isirailiyening ghezzediki hujumlirigha jawab qayturushni seweb qilip, yemen déngiz tewelikide isirailiye shirketlirige chétishliqi barliqini ilgiri sürgen soda paraxotlirini musadire qilishni, bezilirige uchqu we bashqurulidighan bombilar bilen hujum qilishni bashlighan idi.
amérika herbiy qisimliri nurghun qétim yemendin étilghan bashqurulidighan bomba we uchqularning étip chüshürülgenlikini élan qilghan idi.
dunyadiki nurghun xelqaraliq déngiz tiransiport shirketliri husiylarning hujumliri sewebidin qizil déngizdiki paraxot qatnishini bikar qildi.
dunya sodisining texmine %12 i aqdéngizni qizil déngizgha tutashturup, yawropa bilen asiya otturisidiki musapini qisqartidighan süweyish qanili arqiliq emelge ashidu.
