koréye yérim arilida üch dölet manéwir ötküzdi
jenubiy koréye, amérika we yaponiye koréye yérim arilining jenubida birleshme déngiz manéwiri ötküzdi.
türkiye awazi radiyosi xewiri: jenubiy koréye armiye qomandanliq ishtabi üch döletning koréye yérim arilining jenubida birleshme déngiz manéwiri ötküzgenliki toghrisida bayanat élan qildi.
bayanatta, jéju arili etrapida ötküzülgen birleshme déngiz manéwirigha, amérikaning «USS Carl Vinson» awiyamatkasini öz ichige alghan üch döletning 9 urush paraxotining qatnashqanliqi bildürüldi.
bayanatta, manéwirgha qatnashqan döletlerning «shimaliy koréyening yadro, bashqurulidighan bomba we déngiz tehditlirige taqabil turush iqtidarini kücheytish» ni meqset qilghanliqi, manéwirning 15-yanwar bashlanghanliqi we bügün (17-yanwar) axirlashqanliqi qeyt qilindi.
shimaliy koréye 15-yanwar yuqiri sürette we qattiq yéqilghu bilen uchidighan oq béshigha ige ottura musapiliq bashqurulidighan bombini sinaq qilghanliqini élan qilghan idi.
shimaliy koréye rehbiri kim jongun jenubiy koréyege «menggülük düshmen» dep éniqlima bérilishi üchün, asasiy qanungha qaytidin tüzütüsh kirgüzüshni chaqiriq qilghan idi.
kim jongun jenubiy koréye bilen amérikani herbiy manéwir ötküzüp we istratégiyelik qorallarni orunlashturup, koréye yérim arilini éhtimali bolghan urush rayonigha aylandurush bilen eyiblep, jenubiy koréye bilen qaytidin birlishish üstide izdinishning «mumkin emesliki» ni tekitligen idi.
