israiliyelik esirlerning tughqanliri qatar bash ministiri bilen körüshti

türkiye awazi radiyosi xewiri: israiliye metbuatlirining xewerlirige qarighanda, qatar bash ministiri al sani hamas bilen tél awiw hökümiti otturisidiki yéngi esir almashturush söhbitini eslige keltürüshni telep qilish üchün qatargha barghan israiliyelik alte esirning tughqanliri bilen körüshken.

al sani söhbet jeryanida, 2 – yanwar liwanning paytexti béyrutta hamas rehbiri salih elaruri qestlep öltürülgendin kéyin, esir almashturush söhbitining qiyinlashqanliqini otturigha qoyghan.

shuning bilen bir waqitta, israiliye 92 kündin buyan qirghinchiliq élip bériwatqan ghezzediki israiliyelik esirlerning tughqanliri tél awiw we quddusta namayish ötküzüp, hökümetning hamas bilen baldurraq esir almashturush kélishimi tüzüshini telep qilghan.

mehbuslarning tughqanliri israiliye hökümitining esirlerning bixeterlikige mesul ikenlikini bildürgen we hökümetni «esirlerge köngül bölmidi» dep eyibligen.

pelestin islamiy qarshiliq körsitish herikiti — hamasning herbiy qaniti bolghan qessam birigadasi 7-öktebir israiliyening pelestinliklerning hoquqi we mesjidi eqsani öz ichige alghan muqeddes qimmetlerni izchil halda ayagh asti qiliwatqanliqigha naraziliq bildürüsh üchün, «eqsa topani» namliq keng kölemlik hujum qozghap, nurghun israiliyelikni esir alghanidi.

qatarning muresse qilishi netijiside hasil qilinghan isirailiye bilen hamas otturisidiki 7 – öktebirdin buyan dawam qiliwatqan urushlarni «insanperwerlik nuqtisidin töt kün toxtitip turush» kélishimi 24-noyabir (2023) jüme küni shu yer waqti 7.00 de ijra qilinishqa bashlighan, arqidin yene üch kün uzartilghanidi.

esir almashturush kélishimi dairiside, ghezzede tutup turuluwatqan 81 israiliyelik esir bilen israiliye türmiliridiki 240 pelestinlik esir qoyup bérilgenidi.

hamasning qolida yene 130 din artuq israiliyelik esirning barliqi texmin qilinmaqta.