пәләстинлик кичик қиз: «биз йеңи йилға <өлүмләр вә йарлинишлар> билән кириватимиз»
исраилийәниң 7 – өктәбирдин бери ғәззә районида давамлаштуриватқан вәһшиләрчә һуҗумлири сәвәбидин, пәләстинлик кичик қиз йеңи йилға «өлүмләр вә йарлинишлар» билән кириватқанлиқидин қайғурғанлиқини билдүрди.
түркийә авази радийоси хәвири: иҗтимаий таратқуларда һәмбәһирләнгән синда, кичик пәләстинлик қиз ғәззәдин дунйаға хитаб қилип: «йеңи йилиңларға мубарәк болсун, пүтүн дунйа йеңи йилни тәбрикләватиду» дегән җүмлә билән сөзини башлиди.
«биз йеңи йилни өлүмләр, йарлинишлар вә бомбардиманлар билән тәбрикләватимиз» дегән пәләстинлик қиз ғәззәниң хан йунус районида вәзийәтиниң интайин начарлишип кәткәнликини ейтти.
пәләстинлик қиз өзлиригә йеқин бир өйниң сәлла илгири бомбардиман қилинғанлиқини тәкитләп, йеңи йилда урушниң балдуррақ ахирлишишини үмид қилидиғанлиқини билдүрди.
һамасниң қораллиқ қанити иззин әлқасим биригадиси7-өктәбирдә исраилийәниң пәләстинликләрниң һәқ - һоқуқини вә мәсҗиди әқсани өз ичигә алған муқәддәс қиммәтлирини изчил һалда айағ асти қиливатқанлиқиға наразилиқ билдүрүш үчүн, «әқса топани» намлиқ кәң көләмлик һуҗум қозғиғанлиқини җакарлиған. исраилийә қисимлириму уруш айропиланлирини ишлитип ғәззәни вәһшиләрчә бомбардиман қилишни башлиған иди.
исраилийә 7-өктәбирдики һуҗумда 1200 исраилийәликниң өлгәнликини вә 5132 исраилийәликниң йариланғанлиқини елан қилған иди.
исраилийәниң ғәззә райониға қилған һуҗумлирида кәм дегәндә 9100 кичик бала вә 6500 айални қошқанда 21 миң 800 дин артуқ пәләстин пуқраси өлтүрүлди. 56 миң 400 дин артуқ пәләстинлик йариланди. йәнә миңлиған қаза қилғанларниң бина харабиликлири астида икәнлики билдүрүлмәктә.
исраилийә пәләстин хәлқи панаһланған дохтурхана вә маарип органлириниму һуҗум нишани қилип, пуқраларниң ул әслиһәлирини вәйран қилишни давамлаштурмақта.
