zaxarowa: erméniye qilmishlirining mesuliyitini bashqilargha dönggeshke urunmaqta

türkiye awazi radiyosi xewiri: rusiye tashqi ishlar ministirliqi bayanatchisi mariya zaxarowa, eriwan hökümitining erméniyening kolléktip bixeterlik shertnamisi teshkilatidin ayrilish mumkinchiliki toghrisidiki sözlirining meqsitining xataliqlirining mesuliyitini bashqilargha yükleshke urunush ikenlikini otturigha qoydi.

zaxarowa: «rusiye teleplirige jawab qayturmighachqa, erméniyening bashqa tallashlarni izdeshke mejbur bolup qalghanliqi toghrisidiki sözler, méningche, mesuliyitidin qéchish we özining xataliqlirining jinayitini bashqilargha artip qoyushqa urunushtin bashqa nerse emes... men eriwan hökümitining erméniyening tashqi siyaset liniyesini köp xillashturush heqqidiki bayanlirini liniyesini burashtin bashqa nerse bilen chüshendürelmeymen. biz bu mesile toghrisidiki bayanatlarni anglash bilenla qalmay, ishlarning emeliyette qandaq shekillinidighanliqini körüshni xalaymiz» dégenlerni qeyt qildi.

zaxarowaning qarishiche, erméniye emeldarliri bu xil bayanatliri arqiliq «heqiqiy muddiasini yoshurushqa» urunuwatqan bolup, ularning meqsiti döletning tashqi siyasitini tüptin özgertish iken.

zaxarowa yene, eriwanning bu siyasetni gherbning yétekchilikide tallighanliqini ilgiri sürdi.

erméniye bash ministiri nikol pashinyan 23-noyabir minsikta ötküzülidighan kolléktip bixeterlik shertnamisi teshkilati bashliqlar yighinigha qatnashmaydighanliqini élan qilghan we taratqulargha bergen bayanatida, qarabagh weqesining eriwanni bixeterlik sahesidiki munasiwetlirini köp xillashturushqa mejburlighanliqini éytqanidi.