amérikada jo baydin üstidin sotqa  irqiy qirghinchiliq jinayiti erzi sunuldi

türkiye awazi radiyosi xewiri:merkizi amérikada turushluq kishilik hoquq teshkilati «asasiy qanun heq - hoquq merkizi» (CCR) ghezze xelqige qaritilghan «irqiy qirghinchiliq» ni tosup qalalmighanliqi sewebidin amérika pirézidénti jo baydin we hökümiti üstidin sotqa erz sunghanliqini élan qildi.

kishilik hoquq teshkilati «asasiy qanun heq - hoquq merkizi» (CCR), «elheq» we «xelqaraliq balilarni qoghdash teshkilati» qatarliq ammiwi teshkilatlarni öz ichige alghan bir qanche pelestin guruhigha wakaliten bu erzni sunghanliqini bildürdi.

erznamide: «bu dewa pelestinliklerge wakaliten dunyadiki eng négizlik we eng muhim qanuniy we exlaqiy mejburiyetning, yeni irqiy qirghinchiliqning aldini élish mejburiyitining ada qilinishi üchün sunuldi» déyildi.

erznamide ghezzede dawamlishiwatqan «irqiy qirghinchiliq» ning jawabkari baydin, amérika tashqi ishlar ministiri antoniy blinkén we mudapie ministiri loyd ostinning israiliyeni shertsiz qollishi sayisida «irqiy qirghinchiliq» ning yüz bériwatqanliqi tekitlendi.

israiliyening «eng yéqin ittipaqdishi we köp herbiy yardem qilghuchisi» bolghan  amérikaning hazir «ghezze xelqige irqiy qirghinchiliq élip bériwatqan israiliye emeldarlirigha tosqunluq qilish küchige ige» ikenliki uqturuldi.

erznamide yene, baydin we uning hökümiti «kishini chöchitidighan derijidiki puqralar talapetliri» ge qarimastin, urush toxtitish we israiliyege amérikaning herbiy yardimini cheklesh chaqiriqlirinimu ret qilish bilen eyiblendi.

hamasning qoralliq qaniti, izddin elqassam birigadisi 7 - öktebirde «israiliyening pelestinliklerge we mesjidi eqsa qatarliq muqeddes qimmet qarashlirigha , qaratqan üzlüksiz dexli-teruzlini dawamlashturiwatqanliqigha jawaben» keng kölemlik hujum qozghighan idi. israiliye qisimlirimu ghezze rayonigha hawa hujumi qozghap wehshilerche bombardiman qilishni bashlighan idi.

israiliyening ghezzege qilghan hujumida qaza qilghanlarning sani 11 ming 360 din éship ketti.