blinkén türkiyede ziyarette bolidu
amérika qoshma ishtatliri diplomatiye ministiri antoni blinkén türkiyede ziyarette bolidu.
türkiye awazi radiyosi xewiri: diplomatik menbelerning bildürüshiche, amérika qoshma ishtatliri diplomatiye ministiri antoni blinkén 5 – noyabir (2023) küni türkiyede ziyarette bolidiken.
blinkén ete (3-noyabir) israiliye we iyordaniyeni tekrar ziyaret qilidiken. shuning bilen u, israiliye bilen pelestin otturisidiki toqunushlar partlighan 7 – öktebir (2023) din buyan israiliyeni üchinchi qétim ziyaret qilghan bolidiken.
amérika qoshma ishtatliri tashqi ishlar ministirliqi bayanatchisi mattéw millér bu heqte élan qilghan bayanatida, blinkénning jüme küni israiliye we iyordaniyede ziyarette bolidighanliqini eskertip mundaq dédi:
«blinkén israiliyening xelqara insanperwerlik qanunigha asasen özini qoghdash hoquqini qollaydighanliqimizni qayta tekitleydu, shundaqla barliq tedbirlerdin paydilinip puqralarning ölüm nisbitini eng töwen chekke chüshürüshning zörürlüki we insanperwerlik yardem paaliyetliri heqqide israiliye dairiliri bilen özara pikir almashturidu.»
hamasning herbiy qaniti bolghan qassam birigadiliri 7-öktebir (2023) shenbe küni israiliyege qarshi «eqsa topani» namliq keng kölemlik hujum qozghighanliqlirini élan qilghanidi.ghezzedin israiliyege minglighan rakétamiyot étilghan, qoralliq guruppilarmu rayondiki olturaq rayonlargha bésip kirgenidi.
israiliye armiyesi bolsa, urush ayropilanliri bilen ghezze shehirige «tömür qilich herikiti» qozghighanliqlirini bildürgenidi.
israiliye dairilirining bildürüshiche, ghezze rayonigha qaritilghan hujumlar dawamida, 315 eskerni öz ichige alghan 1400 din artuq israiliyelik ölgen, 5132 kishi yarilanghan.
10-ayning 31-künidin buyan ghezze rayonida dawamlishiwatqan toqunushlarda ölgen israiliye eskerlirining sani 17 ge yetken.
israiliye armiyesi bayanatchisi daniyal xagarining éytishiche, hamasning herbiy qaniti bolghan qassam birigadilirining qolida 240 israiliyelik esir bar iken.
ghezzediki pelestin sehiye ministirliqining bildürüshiche, israiliyening hujumlirida 3648 bala we 2290 ayalni öz ichige alghan 8796 pelestinlik qaza qilghan, 22 ming 219 adem yarilanghan.
