abdullahyan: ghezzediki qirghinchiliq tüpeylidin weziyet kontirolluqtin chiqip kétishi mumkin
iran tashqi ishlar ministiri hüseyin emir abdullahyan israiliyening ghezzege qilghan hujumining kishini chöchütidighan derijige yetkenlikini, her qandaq waqitta her qaysi tereplerning kontirolliqidin chiqip kétishi mumkinlikini éytti.
türkiye awazi radiyosi xewiri: iran oqughuchilar xewer agéntliqi (ISNA) ning xewirige asaslanghanda, abdullahyan b d t diki pelestinge dair pewquladde yighingha qatnishish üchün amérikaning nyuyork shehirige yétip barghan we axbaratqa bayanat bergen.
abdullahyan bayanatida, «amérika we bir qisim yawropa döletlirining zionist hakimiyetni qarighularche qollishi bilen ghezze xelqige qiliniwatqan qirghinchiliq we irqiy qirghinchiliq sewebidin, gherbiy asiya rayonidiki weziyet barliq döletlerge nisbeten endishige salidighan derijige yetti. kontrolluq her qandaq waqitta her qaysi tereplerning qolidin chiqip kétishi mumkin» dédi.
abdullahyan israiliyening hujumlirining baldurraq toxtitilishi we ghezzege insanperwerlik yardemlerning yétip bérishi kéreklikini tekitlep, pelestinlik guruppilarning israiliyege qarshi zéminini qoghdash hoquqi barliqini we buning xelqara qanun we birleshken döletler teshkilatining shertlirige uyghun ikenlikini eskertti.
hamasning herbiy qaniti qasim birigadisi 7-öktebir israiliyege «aqsa tufani» namliq keng kölemlik hujum bashlighanliqini élan qilghan we buninggha qarshi israiliye armiyesi urush ayropilanliri bilen ghezze rayonigha qarshi tömür qilich herikitini bashlighanliqini jakarlighan idi.
künséri keskinlishiwatqan tuqunushta her ikki tereptin minglighan kishi jénidin ayrildi.
