isirailiye ghezzediki musapirlar lagérlirini bombardiman qildi

türkiye awazi radiyosi xewiri: isirailiye armiyesining kéche (11-öktebir) boyiche toxtimay ghezzening gherbige jaylashqan eshshati musapirlar lagéri we shimaldiki jibaliya rayonini bombardiman qilishi netijiside, nurghun kishining jénidin ayrilghanliqi bildürüldi.

isirailiye armiyesi ishghal astidiki sherqiy quddusning shimaligha jaylashqan qaléndiya musapirlar lagérigha bésip kirip, bir pelestinlikni éghir yarilandurdi, ikki pelestinlikni qolgha aldi.

isirailiye armiyesi qarshiliq körsetken pelestinliklerge rast oq we yash aqquzush bombisi atti.

isirailiye ayropilanliri ghezzening jenubigha jaylashqan refah shehirining oxshimighan jaylirin bombardiman qildi. bombardimanda toqquz kishi jénidin ayrildi, nurghun kishi yarilandi.

isirailiye armiyesining bu heqtiki yazma bayanatida, refah shehirige qilinghan bombardimanda qassam birigadilirining déngiz qismining yuqiri derijilik emeldari ebu shamlaning öltürülgenliki qeyt qilindi.

bayanatta yene, shamlaning öyide déngiz hujumlirida ishlitilidighan oq-dorilarning saqlanghanliqi ilgiri sürüldi.

bayanatta, pelestinge étilghan rakétalar sanining élan qilinmaydighanliqini eskertip, bu xildiki uchurlarning hamasqa paydiliq bolushi mumkiniliki qeyt qilindi.

ghezzeni toxtimay bombardiman qiliwatqan isirailiye armiyesi, shimalda bir qutquzush mashinisini partlatti we mashinidiki töt neper sehiye xadimi jénidin ayrildi.

ghezzening sherqidimu bir sehiye xadimi isirailiye qisimlirining hujumida jénidin ayrildi.

pelestin sehiye ministirliqi qutquzush mashinisi we sehiye üsküniliri üchün xelqaraliq qoghdashni telep qildi.

isirailiye taratquliridiki xewerlerde bildürülishiche, ghezze etrapidiki yehudiy olturaq rayoni zikimgha mexpiy kirgen pelestin qoralliq küchliri bilen isirailiye eskerliri étishqan. étishishlarda, üch neper pelestinlik qarshiliq körsetküchi öltüürlgen.

isirailiye türmilerdiki barliq pelestinlik mehbuslar solanghan kamérlarning tokini üzüwetti. mesul dairiler buning, «pelestinlik mehbuslarning  etkes téléfon arqiliq tashqi dunya bilen alaqe ornitip térrorluq heriketlirini zakas qilishining aldini élish» ikenlikini bildürdi.

hamasning qoralliq qaniti izzeddin elqassam birigadiliri israiliyening shimalidiki hayfa shehirige «R160» tipliq rakéta bilen hujum qilghanliqini élan qildi. emma, hujumgha munasiwetlik tepsiliy melumat bérilmidi.

hamasning herbiy qaniti elqassam  birigadiliri shenbe (2023-yili 7-öktebir) küni israiliyege «eqsa topani» namliq keng kölemlik hujum qozghighanliqini élan qilghan idi. ghezzedin israiliyege minglighan rakétalar étilghan we qoralliq guruppilar rayondiki yehudiy olturaq rayonlirigha bésip kirgen idi.

israiliye armiyesi urush ayropilanliri bilen ghezze rayonigha qarshi «tömür qilich» herikitini qozghighanliqini élan qildi.

ikki tereptning künséri keskinlishiwatqan toqunushlirida, yüzligen kishi jénidin ayrildi.