xitay su asti paraxotidiki 55 herbiy xadimning ölgenliki ilgiri sürüldi

türkiye awazi radiyosi xewiri: engliyening «taymis géziti» we «kündilik pochta géziti» qatarliq taratqularning engliye dölet bixeterlik idarisi xadimlirining pash qilghanliqi ilgiri sürülüwatqan «mexpiy» kodluq doklatni asas qilghan xewerlirige qarighanda, xitay déngiz armiyesi yadro su asti paraxoti 21 – awghust döletning shimaligha jaylashqan shendung ölkisi déngiz tewelikide «lengger we zenjir» dep atilidighan su astidiki tosuqigha chüshüp qalghan.

mezkur dölet bixeterlik doklatida, «amérika qoshma ishtatliri we uning ittipaqdashlirining su asti paraxotliri üchün qurulghan» qiltaqqa chüshüp qalghan xitay su asti paraxotining alte saet boyiche su yüzige chiqalmighanliqi, bataréyesi xorap, oksigén sistémisi ishlimigenliki üchün, paraxotning kapitani polkownik shü yongping qatarliq 22 ofitsér, yette neper oqughuchi ofétsir, toqquz yardemchi ofitsér we 17 esker bolup, jemiy 55 kishilik paraxot xadimining oksigén yétishmey hayatidin ayrilghanliqi ilgiri sürüldi.

«Dail Mail» gézitining ziyaritini qobul qilghan bir engliye su asti paraxoti eskiri weqe yüz bergende, xitayning xelqaradin qutquzush yardimi telep qilishni xalimighan bolush mumkinchiliki barliqini otturigha qoydi.

xitay bu weqeni téxi jezmleshtürmidi, engliye xan jemeti déngiz armiyesimu bu heqte gézitlerge bayanat bérishni ret qildi.

weqe yüz bergende, xitaydiki ijtimaiy taratqularda bir yadro su asti paraxotining sériq déngiz etrapida yaki teywen boghuzida hadisige uchrighanliqi toghrisida mish- mish paranglar tarqalghanidi.