yawropa ittipaqi we töt döletning wekilliri qarabagh toghrisida özara körüshti

türkiye awazi radiyosi xewiri: yawropa ittipaqi, ezerbeyjan, erméniye, firansiye we gérmaniyening wekilliri bilen bélgiye paytexti biryussélda özara körüshkenlikini, tereplerning kéyinki qétim emelge ashurulidighan yighinda normallishish musapisini ilgiri sürüsh üchün tashlinidighan konkrét qedemlerni muzakire qilghanliqini bildürdi.

bayanatta bildürülishiche, yawropa ittipaqi kéngishi charléz mishélning meslihetchiliri simon mordu, magdaléna grono, yawropa ittipaqining jenubiy kawkaz alahide wekili toywo klar we ezerbeyjan pirézidéntliq mehkimisining meslihetchisi hikmet hajiyéw, erméniye dölet xewpsizlik kéngishining katipi armén grigoryan, firansiye pirézidénti makronning meslihetchisi émmanuél bon, gérmaniye bash ministiri olaf sholzning meslihetchisi plotnér we yawropa ittipaqi kéngishining bashliqi mishél qatarliqlarning qatnishishida yighin ötküzülgen.

yighinda, yawropa ittipaqi xelqaraliq insanperwerlik yardemlerning yetküzülüshige we kishilik hoquq paaliyetchilirige ruxset qilishni, ochuq-ashkariliq hemde ezerbeyjanning qarabaghda yashaydighan ermenlerge munasiwetlik pilani toghrisida tepsiliy melumatqa éhtiyajliq ikenlikini otturigha qoydi.

ezerbeyjan pirézidéntliq mehkimisining meslihetchisi hikmet hajiyéw ezerbeyjanning yerlik xelqqe insanperwerlik yardemlirini yetküzüsh we bixeterlikni kapaletke ige qilish pilanlirini xulasilidi.

hajiyéw bilen grigoryan kéyinki qétim ötküzülidighan yighinda normallishish musapisini ilgiri sürüsh üchün tashlinidighan konkrét qedemler üstide söhbet ötküzdi.

bayanatta, mezkur yighinning 5-öktebir (2023) de ispaniyede ötküzülidighan yawropa siyasiy jemiyetler yighini ramkisida, mishél bilen töt döletning rehberliri otturisida emelge ashurulidighan uchrishishning teyyarliqliri üchün özara pikir almashturushqa sharait yaritip bergenliki qeyt qilindi.