amérika ashliq kélishimi üchün türkiyege rehmet éytti
amérika tashqi ishlar ministirliqi türkiyening qaradéngiz ashliq karidori kélishimige munasiwetlik körsetken diplomatik tirishchanliqliri üchün rehmet éytti.
türkiye awazi radiyosi xewiri: amérika tashqi ishlar ministirliqi bayanatchisi türkiye tashqi ishlar ministiri xaqan fidanning tünügün (31-awghust) moskwada rusiye tashqi ishlar ministiri sérgéy lawrow bilen körüshüp, ashliq kélishimini yéngilashning ehmiyiti üstide toxtalghanliqi toghrisida yazma bayanat élan qildi.
u: «türkiye bilen bashqa döletlerning rusiyeni kélishimge qayturup kélish tirishchanliqlirini qizghin qarshi alimiz. qaradéngiz ashliq karidori kélishimige munasiwetlik körsitilgen diplomatik we emeliy tirishchanliqliri üchün, natodiki ittipaqdishimiz türkiyege teshekkür éytimiz. » dédi.
türkiye tashqi ishlar ministiri xaqan fidan moskwada rusiye tashqi ishlar ministiri lawrow bilen birlikte ötküzülgen axbarat élan qilish yighinida, qaradéngiz ashliq kélishimi üstide toxtilip: «dölitimizning tirishchanliqliri netijiside, b d t yéngi teklip layihesi teyyarlidi. biz bu teklip layihesini qaradéngiz ashliq kélishimini qayta yolgha qoyushning muwapiq asasi dep qaraymiz, tirishchanliqlirimizni dawamlashturimiz. bu kélishim hem dunya yémek-ichmek bixeterliki hemde qaradéngizning muqimliqi we tinchliqi üchün pewquladde muhim ehmiyetke ige» dégen idi.