burkina faso bilen mali nigérgha urush ayropilanliri ewetti
mali we burkina faso gherbiy afriqa döletliri iqtisadiy ortaq gewdisi (ECOWAS) ning nigérgha herbiy arilishishigha qarshi bu döletke urush ayropilanliri ewetti.
türkiye awazi radiyosi xewiri: nigér döletlik téléwiziye qanili (RTN) ning xewiride, mali bilen burkina fasoning nigér bilen hemkarliship, nigérgha urush ayropilanlirini orunlashturghanliqi eskertilip mundaq déyildi:
«mali bilen burkina faso nigérgha qaritilghan herqandaq hujumgha taqabil turush üchün dölitimizge urush ayropilanlirini orunlashturdi. bu arqiliq bu ikki dölet birleshme bayannamege asasen wedilirini konkrét heriketke aylandurdi.»
xewerning körünüshliride, mezkur ayropilanlarning « SuperTucano» tipliq urush ayropilanliri ikenliki diqqet qozghidi.
gherbiy afriqa döletliri iqtisadiy ortaq gewdisige eza döletlerning bash ishtab bashliqlirining tünügün gananing paytexti akrada chaqirilghan yighinida, nigérgha herbiy arilishish waqtining éniq békitilgenliki uqturulghanidi.
gherbiy afriqa döletliri iqtisadiy ortaq gewdisi eskerlerning buyruq kelgen haman nigérgha herbiy arilishishqa teyyar ikenlikini bildürgen, emma bu herbiy arilishishning qachan bashlinidighanliqi toghrisida melumat bermigenidi.
herbiy hakimiyetler wezipe ötewatqan burkina faso bilen malimu ilgiri élan qilghan birleshme bayannameside, gherbiy afriqa döletliri iqtisadiy ortaq gewdisining nigérdiki herbiy - siyasiy özgirishning yönilishini herbiy arilishish arqiliq özgertish pilanigha qarshi nigér terepte turidighanliqlirini uqturghanidi.
birleshme bayannamede, nigérgha qaritilghan herqandaq herbiy arilishishning burkina faso we maligha qarshi urush élan qilish hésablinidighanliqi toghriliq agahlandurush bérilgenidi.
