gherbiy afriqa iqtisadiy birleshmisi nigérda yüz bergen hujumni eyiblidi

türkiye awazi radiyosi xewiri: gherbiy afriqa iqtisadiy birleshmisi nigérning mali chégrasida yüz bergen térrorluq hujumini eyiblep bayanat élan qildi.

bayanatta, mezkur térrorluq hujumining shiddet bilen eyiblinidighanliqi, nigér xelqi bilen jénidin ayrilghan 17 eskerning aililirige chongqur teziye bildürülidighanliqi qeyt qilindi.

bayanatta mundaq déyildi:

«gherbiy afriqa iqtisadiy birleshmisi nigérdiki wetenni qoghdash milliy kéngishini démokratik usulda xelq teripidin saylanghan pirézidént muhemmed bazumgha qarshi qilinghan herbiy herikettin buyan téximu yamanlashqan dölet bixeterliki weziyitige diqqetni merkezleshtürüsh üchün, asasiy qanun tertipini qayta ornitishqa chaqiridu.»

nigérning mali chégrasigha jaylashqan tillabéri rayonidiki boni we torodi nahiyeliri arisida kétiwatqan herbiy aptomobillargha kimliki namelum kishilerning oq chiqirishi netijiside, 17 esker jénidin ayrilip, 20 esker yarilanghan idi.

nigér pirézidénti muhemmed bazum 26-iyul (2023) pirézidéntliq mehkimisining muhapizet bataliyoni teripidin tutqun qilinghan we shu küni axshimi armiye hakimiyetni ötküzüwalghanliqini élan qilghan idi.

pirézidéntliq mehkimisi muhapizet bataliyonining qomandani général abdurrahmané tchyani 28-iyul «wetenni qoghdash milliy kéngishi» namliq herbiy hakimiyetning rehberlikini üstige alghan we waqitliq hökümetning bashliqi bolghan idi.

nigérda 9-awghust laminé zéyin bash ministirliq wezipisige teyinlinip bir kün ötkendin kéyin, herbiy we puqralardin teshkil tapqan 21 kishilik kabént élan qilindi.

pirézidént muhemmed bazum 26-iyuldin buyan shexsiy turalghusida nazaret astida turuwatqan bolup, uning téléfon körüshüshlirige ruxset qilinidu.