daniyediki töt döletning elchixanisi aldida quran kerimni köydürüsh qilmishi qayta sadir qilindi

türkiye awazi radiyosi xewiri: islamgha qarshi heriketliri bilen tonulghan ashqun milletchi «DanskePatrioter  (daniye wetenperwerliri)» namliq guruppining ezaliri daniye paytexti kopénhagéndiki türkiye elchixanisi aldida quran kerimni köydürdi.

islamni haqaretleydighan shoarlarni towlighan guruppa ezaliri, qebih qilmishlirini ijtimaiy alaqe toridiki adréslirida biwasite tarqatti.

daniye tashqi ishlar ministiri lars lokké rasmussén teripidin yézilghanliqi ilgiri sürülgen bir kitabnimu köydürgen guruppa ezaliri, arqidin iraq, misir we seudi erebistan elchixanilirining aldidimu quran kerimni köydürdi.

islam hemkarliq teshkilatigha eza döletler tashqi ishlar ministirlirining quran kerimge qilinghan hujumlarni muzakire qilish meqsitide chaqirilghan düshenbe (2023 – yili 31 – iyul) künidiki 18- nöwetlik pewquladde yighini dawamlishiwatqan esnada, shiwétsiye bilen daniyede quran kerimge hujum qilish qilmishliri sadir qilinghanidi.

daniye tashqi ishlar ministiri lars lokké rasmussénmu twittérdiki adrésida bayanat élan qilip, dölitining islam hemkarliq teshkilati yighinining qararlirini nezerge alidighanliqini tekitlep: «biz islam hemkarliq teshkilati we uninggha eza döletler bilen özara hörmet qilish asasidiki qoyuq söhbetni dawamlashturimiz. daniye yéqinqi mezgillerdiki quran kerimning köydürülüshi qilmishlirini eyiblidi we u pikir erkinliki dairisidiki alahide ehwallargha arilishish mumkinchiliki üstide izdiniwatidu» dégenlerni qeyt qilghanidi.

shiwétsiye bilen daniyening yéqinqi mezgillerde ewj élip ketken quran kerimge hujum qilishtek qebih qutratquluqlargha ruxset qilishi naraziliq qozghimaqta.