giruziyede oqughuchilar derslirini bayqut qildi

türkiye awazi radiyosi xewiri: hakimiyet béshidiki giruziye arzusi partiyesi ötken ay (aprél) parlaméntqa sunghan «chet el tesirining ochuq-ashkara bolushi» qanun teklip layihesige qarshi bashlanghan namayishlar, texminen bir aydin buyan dawam qilmaqta.

paytext tiblista kech saetlerde oxshimighan kochilarda toplanghan namayishchilar, parlamént binasigha qarap yürüdi. arisida uniwérstét oqughuchilirimu bolghan namayishchilar, piyade yürüsh jeryanida qanun teklip layihesige qarshi shoarlarni towlidi.

qanun teklip layihesining «rusiye qanuni» ikenlikini bildürgen namayishchilar, hökümetke qarshi shoarlarni towlidi. qollirida bolsa, giruziye, yawropa ittipaqi we ukrainaning bayraqlirini kötürüwaldi.

namayishchilar hökümetni talash-tartishliq qanun teklip layihesini parlaménttin qayturuwélishqa chaqirdi we qanun teklip layihesining yawropa ittipaqi bilen bir gewdilishishige selbiy tesir körsitidighanliqini ilgiri sürdi.

tiblistiki namayishlar shiddetlik yamghurgha qarimay dawamlashti.

giruziyening oxshimighan uniwérstétlirida oqughuchilar derslerni bayqut qildi.

bash ministir irakli kobaxidzé tiblista dawamlishiwatqan namayishlargha qatnashqanlarni, saqchilargha zorawanliq qilish bilen eyiblidi.

u xelqning köpinchisining hökümetni we «chet el tesirining ochuq-ashkara bolushi» qanun teklip layihesini qollaydighanliqini, özlirining layiheni qanungha aylandurush iradisining qetiy ikenlikini tekitlidi.

giruziye parlaméntida 17-aprél (2024) birinchi qétim, 1-may ikkinchi qétim testiqlanghan qanun teklip layihesi, üchinchi qétim testiqlanghandin kéyin resmiy qanungha aylinidu.

giruziye parlaménti mezkur qanun teklip layihesige eng axirqi qétim awaz tashlash üchün bügün (14-may) toplinidu. giruziye pirézidénti salomé zurabishwili qanun teklip layihesige qarshi ikenlikini tekitlep kelmekte.

biraq, hakimiyet béshidiki partiye parlaméntta pirézidéntning ret qilish hoquqidin ötüp kétidighan derijide köp orungha ige.

mezkur qanun teklip layiheside, giruziyede qurulghan meblighining %20 i chet ellerning yardimi igelleydighan fondlarning «chet el küchining menpeetini chiqish qilidighan teshkilat» dep tizimgha élishni, undaq bolmighanda, jerimane qoyush؛ fondlarni tizimgha élish resmiyetlirige giruziye edliye ministirliqining mesul bolushi telep qilinidu.