shiwétsiye bilen daniye islam hemkarliq teshkilatining qararliri toghrisida bayanat élan qildi
shiwétsiye bilen daniye islam hemkarliq teshkilatigha eza döletler tashqi ishlar ministirlirining quran kerimge qiliniwatqan hujumlar toghrisidiki 18 – nöwetlik pewquladde yighinining qarar we tewsiyelirige estayidil qaraydighanliqini bildürdi.
türkiye awazi radiyosi xewiri: shiwétsiye tashqi ishlar ministiri tobiyas bilstrom shiwétsiye döletlik téléwiziye qanili SVT gha bayanat bérip: «qarar bir qatar teklip we tewsiyelerni öz ichige alidu. biz bularni estayidilliq bilen tekshürüp, islam hemkarliq teshkilatigha eza döletler bilen bolghan muhim diyalogimizni dawamlashturimiz. hökümet shiwétsiyediki namayishlarda shexsler sadir qilghan islam düshmenliki heriketliridin yiraq turidu. edliye ministirliqi tertip – intizam qanunini qayta tehlil qilish xizmetlirini dawamlashturuwatidu» dédi.
daniye tashqi ishlar ministiri lars lokké rasmussénmu twittérdiki adrésida bayanat élan qilip, dölitining islam hemkarliq teshkilati yighinining qararlirini nezerge alidighanliqini tekitlep: «biz islam hemkarliq teshkilati we uninggha eza döletler bilen özara hörmet qilish asasidiki qoyuq söhbetni dawamlashturimiz. daniye yéqinqi mezgillerdiki quran kerimning köydürülüshi qilmishlirini eyiblidi we pikir erkinliki dairisidiki alahide ehwallargha arilishish mumkinchiliki üstide izdiniwatidu» dégenlerni qeyt qildi.
islam hemkarliq teshkilati bu heqte chaqirilghan tünügün (31-iyul) ki pewquladde yighinidin kéyin bayanat élan qilip, shiwétsiye bilen daniyediki quran kerimning muqeddeslikige qayta- qayta qilinghan hujumlarning qattiq eyiblengenlikini otturigha qoyghanidi.
bayanatta, islam hemkarliq teshkilatining yawropa ittipaqi komitétigha wekiller ömiki ewetip, pikir erkinliki namida élip bériliwatqan bu xil qilmishlarning tekrarlinishining aldini élishni qarar qilghanliqi hemde eza döletlerni quran kerim köydürülgen döletler bilen bolghan munasiwitini qayta közdin kechürüp, tégishlik pozitsiye bildürüshke chaqiridighanliqi qeyt qilinghanidi.
bu arqa körünüshte, eza döletlerdin shiwétsiye we daniyediki bash elchilirini meslihetlishish meqsitide qayturup kélishni öz ichige alghan siyasiy qedemlerni tashlishi telep qilinghanidi.
islam hemkarliq teshkilatining mezkur témigha munasiwetlik tor yighini dawamlishiwatqan peytte, daniye bilen shiwétsiyede quran kerimge hujum qilish qilmishliri sadir qilinghanidi.
