daniyede dawam qiliwatqan quran kerimge hujum qilish qilmishlirigha bolghan naraziliqlar dawamlashmaqta

türkiye awazi radiyosi xewiri: daniyede quran kerimge hujum qilish qilmshiliri dawamlashmaqta؛ türkiye jumhuriyiti tashqi ishlar ministirliqi weqe toghrisida yazma bayanat élan qilip: «muqeddes kitabimiz quran kerimge qarshi dawamlishiwatqan hujumlarni eng küchlük shekilde eyibleymiz» dégenlerni qeyt qildi.

daniye dairilirining bu hujumlargha üzlüksiz köz yumushi we bu ighwagerchiliklerni qoghdishining, bu weqening aqiwitining éghirliqini körüp yételmigenlikini körsitip bergenlikige isharet qilinghan bayanatta: «bu xil hujumlar milyardlighan musulmanlarni renjitipla qalmay, ijtimaiy tinchliq we teng mewjut bolup turush medeniyitigimu ziyan yetküzmekte. daniye dairiliri bu xil öchmenlik jinayetlirining qayta yüz bérishining aldini élish üchün, zörür tedbirlerni yolgha qoyushi kérek» déyildi.

türkiye edliye ministiri yilmaz tunchmu özining ijtimaiy taratqudiki adrésida bayanat bérip: «erkinlik toni astida köz yumulghan, démokratiyeni ilgiri sürüsh arqiliq tamasha qilip turulghan bu hujumlar, islam dunyasiningla emes, pütkül insaniyetning tinchliqi we xatirjemlikige ziyan yetküzüshni nishan qilidu» dédi.

adalet we tereqqiyat partiyesi muawin reisi, qoshumche partiye bayanatchisi ömer chelikmu özining tiwittérdiki adrésida bayanat bérip: «muqeddes kitabimiz quran kerimge qarshi sadir qiliniwatqan hujumlar lenetleshke layiq peskesh qilmishlardur. bu öchmenlik qilmishlirining jawabkari daniye dairiliridur. dairiler insan qélipidin chiqqan bu xil qilmishlargha köz yummaqta» dédi.

birleshken döletler teshkilati omumiy kéngishimu muqeddes kitablargha qaritilghan zorawanliqning aldini élish toghrisida yighin chaqirdi؛ b d t omumiy kéngishi marakesh teripidin sunulghan teklipni qobul qilip, diniy étiqadliri sewebidin kishilerge, muqeddes kitablargha we diniy sorunlargha qaritilghan her xil zorawanliqlarni xelqara qanungha xilapliq qilghanliq, dep békitti.

islam hemkarliq teshkilatimu shiwétsiye we daniyediki quran kerimge hörmetsizlik qilish qilmishini muzakire qilish üchün düshenbe küni pewquladde yighin échishni qarar qildi.

shiwétsiye bayanat élan qilip: «quran kerimge qilinghan hörmetsizlikning qayta sadir bolmasliqi üchün tirishiwatimiz» dédi.

shiwétsiye tashqi ishlar ministiri tobiyas bilstrom bu hujumlargha «peskeshlerche» dep baha bérip, ammiwiy tertipni saqlash toghrisida shiwétsiye qanunigha özgertish kirgüzüsh mumkinchilikini muhakime qiliwatqanliqlirini bildürdi.