girétsiyening kéme qazasidin aman qalghanlardin «süküt qilish»ni telep qilghanliqi ilgiri sürüldi

türkiye awazi radiyosi xewiri: girétsiye déngiz qirghiqi mudapiesi xadimlirining girétsiyening mora yérim arili déngiz tewelikide yüz bergen köchmenler pajiiesidin aman qalghanlargha «dairilerning apettiki roli heqqide söz qilmasliq»ni éytqanliqi ilgiri sürüldi.

BBC ning xewiride, hayat qalghuchilarning kémining girétsiye déngiz qirghiqi muhapizet etriti xadimliri sörep élip méngishqa tirishiwatqan esnada chöküp ketkenlikini, dairilerning hayat qalghanlargha «süküt qilish»ni éytqanliqini bildürgenliki qeyt qilindi.

xewerde yene, girétsiye déngiz qirghiqi muhapizet etritining köchmenlerge bésim ishlitip, paraxottiki misirliq toqquz kishining adem etkeschisi ikenlikini éytishini telep qilghanliqi ilgiris sürüldi.

kalamata teptishi we soraq sotchisi, 20 - iyundiki kéme qazasidin qutulghandin kéyin, köchmen etkeschiliki jinayiti bilen shughullinish bilen eyiblinip nazaret astigha élinghan toqquz misirliqning tutqun qilinishigha höküm qilghanidi.

14 – iyun (2023) girétsiyening mora yérim arilidiki nawarinoning 47 déngiz mili yiraqliqidiki xelqara déngiz tewelikide, tertipsiz köchmenlerni élip mangghan bir béliqchi kémisi gherq bolup kétip, 82 adem qaza qilghan, 104 adem qutquzuwélinip, kalamata portigha élip bérilghanidi.

ijtimaiy küchler bashqurushidiki «alarm fun (signal téléfoni)»  orginining bildürüshiche, qazagha yoluqqan kémide texminen 700 adem bar iken.

girétsiye taratqulirining xewerliride, qazaning girétsiye déngiz qirghiqi muhapizet etritining biperwaliqi netijiside meydangha kelgenliki ilgiri sürülgenidi.

girétsiyening asasliq öktichi partiyesi — radikal solchilar ittipaqi rehbiri alékis chipras weqe heqqide uchur igilesh üchün, aman qalghan köchmenler yötkelgen kalamata portini ziyaret qilghan we u yerde bayanat bérip, köchmenlerning uninggha girétsiye déngiz qirghiqi muhapizet etritining paraxotni italiye déngiz tewelikige ötüp kétishke qistighanliqini bildürgenlikini éytqanidi.