firansiyede naélni öltürgen saqchining ailisige meblegh toplash herikiti talash- tartish qozghidi

türkiye awazi radiyosi xewiri: ashqun ongchil érik zémmorning sabiq bayanatchisi zhan méssiha teripidin «gofundmé» supisidin naélni öltürgen saqchining aile-tawabiatlirini qollash üchün bashlanghan we tünügün kechte axirlashqan meblegh toplash paaliyitining qanunluq yaki emesliki talash - tartish qilinmaqta.

tünügün kechkiche 1 milyon 636 ming 220 yawrogha yetken «nentérré saqchisining ailisini qollash» namliq meblegh toplash paaliyitige texminen 45 ming adem qatnashti.

sol qanat jemiyetler meblegh toplash paaliyitini «namunasip heriket» dep atidi. artur délaporté we matildé panot qatarliq parlamént ezaliri bolsa «öchmenlik, zorawanliq yaki ayrimchiliqqa qutratquluq qilish» jinayiti sewebidin bu paaliyetke qarita qanuniy jehettin heriketke ötidighanliqlirini uqturdi.

firansiye bash ministiri élizabét borné bu paaliyetning qanunluq yaki emesliki heqqide  hökümetning emes, sot mehkimisining  qarar chiqirishi kéreklikini éytti.

naélning ailisining adwokati yasin bozro meblegh toplash paaliyitini qozghighan messihaning «teshkillik aldamchiliq» jinayiti sadir qilghanliqini ilgiri sürüp, uning üstidin sotqa erz sundi.

firansiye saqchisi 27-iyun nentérré rayonida 3 adem olturghan mashinigha qaritip oq chiqirip, 17 yashliq shopur naél mini öltürgenidi.

weqedin kéyin, naélning ölümige naraziliq bildürgenler  firansiyening herqaysi jayliridiki oxshimighan sheherlerde kochilargha chiqip namayishlarni ötküzüp, saqchilar bilen toqunushqanidi.

mezkur yashni öltürgen saqchi ishtin boshitilghan we uning tutqun halitide sotlinishi  qararlashturulghanidi.

buningdin bashqa yene, parizh, marsélya we liyon qatarliq nurghun sheherlerde ötküzülgen namayishlarda talan – tarach we bulang – talang  qilmishliri yüz bergen, shu jay waqti saet 21.00 giche 10 dek sheherde sirtqa chiqishni cheklesh buyruqi élan qilinghanidi.