titanik sayahiti teshkilligen su asti paraxoti tépildi

türkiye awazi radiyosi xewiri: yekshenbe küni (18-iyun) atlantik okyandiki titanik paraxotining qalduqlirini körüsh sepiride ghayib bolghan «titan» namliq su asti paraxotining «qalduqliri», su asti paraxotidiki jénidin ayrilghan besh kishining jesiti bilen birge tépildi.

amérika déngiz qirghiqi muhapizet etritining xadimliri su asti paraxotining bésim sewebidin partlap parchilinip ketkenlikini élan qildi.

«titan» namliq su asti paraxotining parchiliri, titanikning qalduqliridin 488 métir yiraqliqta, töt kilométir chongqurluqta tépildi.

«wal kochisi géziti», amérika déngiz armiyesining mexpiy awaz sistémisining titan su astigha shungghup uzun ötmeyla partlash awazini bayqighanliqini yazdi.

su asti paraxotigha munasiwetlik échinishliq tepsilatlar otturigha chiqishqa bashlidi.

yoqap ketken su asti paraxotida jénidin ayrilghan engliyelik milyardér stokton rush (StocktonRush) ning ayali wéndi rush (Wendy Rush) ning 1912-yili titanik weqeside jénidin ayrilghan bir er-ayalning newrisi ikenliki bildürüldi.

uzunluqi texminen 6.5 métir kélidighan su asti paraxoti titan, besh yoluchisi bilen yekshenbe küni 96 saet yétidighan oksigén miqdari bilen sugha shungghup, titanik paraxotining qalduqlirini körüsh sayahiti teshkilligen idi.

bu yoluchilar ichide 58 yashliq engliyelik milyardér xamish xarding (Hamish Harding), pakistandiki eng bay sodigerlerning biri 48 yashliq shahzade dawut we uning 19 yashliq oghli sulayman, okyan derwazisi (OceanGate) shirkitining qurghuchisi stokton rush, firansiyelik su asti paraxoti matrosi pawl xénriy nargéyolét (Paul Henry Nargeolet)  bar idi.

seper waqti 2.5 saet etrapida texmin qilinghan su asti paraxotining «Polar Prince» namliq paraxot bilen bolghan alaqisi 1 saet 45 minuttin kéyin üzülüp qalghan idi.

pakistan tashqi ishlar ministirliqi yoqap ketken su asti paraxotida jénidin ayrilghan besh kishi üchün teziye télégrammisi élan qildi.

télégrammida, yoqap ketken su asti paraxotidiki shahzade dawut bilen oghli sulayman dawutni öz ichige alghan besh kishining ölümi munasiwiti bilen, ularning aililirige we yéqin-yoruqlirigha sewr tilendi, nurghun döletlerning  su asti paraxotini tépish üchün körsetken tirishchanliqliri üchün teshekkür éytildi.