b d t: köchmen kémisi qazasida 78 adem hayatidin ayrildi, 500 ge yéqin adem yoqap ketti

türkiye awazi radiyosi xewiri: birleshken döletler teshkilati (b d t) kishilik hoquq aliy komissari wolker türk yazma bayanat élan qilip, mora yérim arilida «dehshetlik pajie» yüz bergenlikini bildürdi.

u bayanatida kéme qazasida hayatidin ayrilghan 78 tertipsiz köchmenning aile - tawabiatigha teziye bildürüp: «ayallar we balilarni öz ichige alghan 500 dek adem yoqap ketti. hayat qalghanlar we apette qaza qilghanlarning aile-tawabiatliri bilen hemkarlishish intayin muhim» dédi.

u bu weqeni chöridigen halda etkeschiler we adem etkeschilirini tekshürüsh we ularni qanunning bir terep qilishigha tapshurushning muhimliqini tekitlidi.

wolker türk her qaysi döletlerni tertiplik köchüsh qanallirini échish we mesuliyetni teng üstige élishqa chaqirip, déngizlardin qutquzuwélinghan barliq kishilerning bixeter halette waqtida quruqluqqa chiqirilishi toghrisida qanunlarning chiqirilishini telep qildi.

14 – iyun (2023) girétsiyening mora yérim arilidiki nawarinoning 47 déngiz mili yiraqliqidiki xelqara déngiz tewelikide, tertipsiz köchmenlerni élip mangghan bir béliqchi kémisi gherq bolup kétip, 78 adem hayatidin ayrilghan, 104 adem qutquzuwélinip, kalamata portigha élip bérilghanidi.

girétsiye déngiz qirghiqi muhapizet etriti qutquzuwélinghan köchmenlerning 47 nepirining süriyelik, 43 nepirining misirliq, 12 nepirining pakistanliq we ikki nepirining pelestinlik ikenlikini élan qilghaniidi.

ijtimaiy küchler bashqurushidiki «alarm fun (signal téléfoni)»  orginining bildürüshiche, qazagha yoluqqan kémide texminen 700 adem bar iken.

izdesh we qutquzush xizmetliri hélihem dawamlishiwatqan bolup, mutexessisler qaza qilghanlar sanining köpiyip kétishidin endishe qiliniwatqanliqini bildürmekte.