stolténbérg shiwétsiyening nato ezaliqining hel qilghili bolmaydighan halette emeslikini bildürdi
shimaliy atlantik ehdi teshkilati – nato bash katipi yéns stolténbérg shiwétsiyening natogha eza bolush musapisining hel qilinmaydighan halette emeslikini éytti.
türkiye awazi radiyosi xewiri: bash katip yéns stolténbérg bélgyening paytexti biryussélda chaqirilghan natogha eza döletlerning tashqi ishlar ministirliri yighinining birinchi künidiki «nato – ukraina komitéti yighini»din kéyin, axbarat élan qilish yighini ötküzdi.
stolténbérg buning finlandiyening nato ezasi süpitide qatnashqan tunji qétimliq yighin ikenlikini eskertip, özlirining ukrainadiki urush hemde bu döletke özini qoghdash we uning yawro - atlantik okyanning bir qismi bolushini qollash mesilisini muzakire qilghanliqini éytti.
stolténbérg shiwétsiyening nato ezaliqi mesilisi toghrisidiki bir soalgha jawab bérip: «finlandiyening ezaliqi shiwétsiyening bixeterlikini téximu ashuridu. bu jeryan hel qilinmaydighan halette emes» dédi.
bir qanche hepte ilgiri jumhur reis rejep tayyip erdoghan bilen körüshüp, bu jeryanni qayta bashlash toghrisida kélishkenlikini bildürgen yéns stolténbérg: «biz bu yerde — nato merkizide finlandiye, shiwétsiye we türkiye bilen birlikte bir yighin achtuq. qayta söhbetlishishke kélishtuq we dawamlishiwatqan söhbetler bar. shiwétsiyening ezaliqi mesiliside ilgirilesh hasil qilish üchün, oxshimighan qatlamlar boyiche tirishchanliq körsitishni dawamlashturuwatimiz» dégenlerni qeyt qildi.
