hondurasning xitay bilen diplomatik munasiwet ornitishni jakarlishi, amérikani heriketke keltürdi
honduras xitay bilen diplomatik munasiwetlerni ornitidighanliqini élan qilghandin kéyin, amérikaning latin amérika alahide wekili kristofér dod (Christopher Dodd) hondurasni ziyaret qilidu.
türkiye awazi radiyosi xewiri: latin amérika qitesining otturisigha jaylashqan hondurasning xitay bilen diplomatik munasiwet ornitish niyitini ashkarilishi, washingtonni heriketke keltürdi.
amérika tashqi ishlar ministirliqi pirézidént jo baydinning latin amérika alahide wekili kristofér dodni 17-21-mart künliri honduras bilen panamani ziyaret qilishqa ewetidighanliqini élan qildi.
amérika tashqi ishlar ministirliqi élan qilghan kristofér dodning ziyaritige munasiwetlik bayanatta, «alahide wekil dod hondurasta dölet rehberliri we soda-sanaetchilerning wekilliri bilen körüshidu. bu ziyaret, amérikaning gherbiy yérim sharda hemmini öz ichige alidighan iqtisadiy éshishni, démokratiyeni, kishilik hoquqni we qanunning hemmidin üstünlükini ilgiri sürüsh wedisini qollaydu» déyildi.
honduras pirézidénti siyomara kastro 14-mart (2023) twittér adrésida, «tashqi ishlar ministiri édward réynani, hökümet pilanigha emel qilip, dunyadiki döletler bilen mas halda chégrani erkin kéngeytish irademning bir belgisi süpitide, xitay bilen resmiy munasiwet ornitish toghrisida yolyoruq berdim» dep bayanat élan qilghan idi.
eger honduras xitay bilen diplomatik munasiwet ornatsa, yéqinqi yillarda teywen bilen bolghan diplomatik alaqisini üzgen, panama, salwador, dominika jumhuriyiti we nikaragua qatarliq latin amérikasidiki döletler sépige qoshulidu.
honduras diplomatik munasiwitini üzse, teywenni étirap qilidighan döletler 13 ke chüshüp qalidu.
amérika yéqinqi yillarda dunyadiki nurghun döletlerni, bolupmu afriqadiki döletlerni xitayning «qerz tuziqi» gha pétip qalghanliqini ilgiri sürmekte.
