seudi erebistan-iran diplomatik munasiwetliri qaytidin bashlinidu

türkiye awazi radiyosi xewiri: seudi erebistan tashqi ishlar weziri seudi erebistanning qollishidiki «sherqul ewsat géziti» ning ziyaritini qobul qilip, faysal bin ferxan: «iran bilen tüzülgen kélishim mesililerni diyalog we diplomatiye yoli bilen hel qilish toghrisidiki ortaq arzuni körsitip béridu» dédi.

u ikki ay ichide iran bilen munasiwetlerni qaytidin bashlashqa teyyarlanghanliqlirini bildürüp, kéyinki mezgillerde özara ziyaretlerning qilinidighanliqini qeyt qildi.

u seudi erebistan bilen iran otturisida tüzülgen kélishimde, xitayning muhim rol oynighanliqini eskertip: «rayonda xewpsizlik we muqimliq muhitini berpa qilish mesiliside, béyjing, téhran bilen ortaq menpeetlirimiz bar» dédi.

iran bilen seudi erebistan aridin yette yil ötkende, diplomatik munasiwetlerni qaytidin bashlash mesiliside kélishim hasil qilghan idi. ikki dölet otturisida tüzülgen kélishim, 10-martta iran, seudi erebistan we xitay teripidin élan qilinghan ortaq bayanat bilen bildürülgen idi.

seudi erebistanda 2016-yili 2-yanwar shie diniy rehber nimr elnimrni öz ichige alghan 47 kishi «térrorluq jinayiti» bilen eyiblinip öltürülgen idi. iran hökümiti buninggha naraziliq bildürüp, arqimu arqa bayanatlarni élan qilghandin kéyin, seudi erebistanning téhrandiki elchixanisigha we meshhedtiki konsulxana binalirigha iran namayishchiliri teripidin ot qoyup bérilgen idi. 2015-yili martta bashlanghan yemendiki kirizis sewebidin eslidinla yirikleshken ikki döletning diplomatik munasiwetliri pütünley üzülgen idi.