medeniyet - senet dunyasi türkiyege yardem bérish chaqiriqida bolmaqta

türkiye awazi radiyosi xewiri: amérikaliq naxshichi we artis séléna goméz ammiwi ortaqlishish tor béti Instagram sehipisidiki  377 milyon egeshküchisi bilen birlikte, xarabiliklerning astidin qutquzuwélinghan bir balining süritini we birleshken döletler teshkilati balilar fondi (UNICEF) tor bétining yardem seperwerlik paaliyetlirining ulinishini hembehirlep mundaq dédi: «süriye we türkiyediki yer tewreshte talapetke uchrighanlar üchün yürikim yérilip ketti.»

shakiramu ammiwi ortaqlishish tor béti Instagram sehipiside, xarabilik astidin qutquzuwélinghan bir balining süriti üstige, türkiye we süriyediki yer tewresh apitining balilargha körsetken qattiq tesirini isharetlep,  birleshken döletler teshkilati balilar fondi tor bétining yardem seperwerlik paaliyetlirining ulinishini egeshküchiliri bilen ortaqlashti.

amérikaliq naxshichi we artis jénnifér lopéz bolsa, özining türkiye we süriyediki mestanilirige yardem ewetkenlikini bayan qilip mundaq dédi: «bu her 100 yilda bir qétim rayongha éghir talapetlerni yetküzidighan eng küchlük yer tewresh.»

lopéz birleshken döletler teshkilati balilar fondining tor bétining yardem seperwerlik paaliyetlirining ulinishini egeshküchiliri  bilen ortaqliship, ularni bu ulinish arqiliq türkiye we süriyediki talapetke uchrighan balilargha yardem bérishke chaqirdi.

hindistanning dangliq artisi jénnifér wingét ammiwi ortaqlishish tor béti Twitter sehipiside élan qilghan  uchurida, özining yer tewresh rayonliridin tartilghan  foto- süretlerni qattiq azab  - oqubet ichide körgenlikini we talapetke uchrighanlargha dua qiliwatqanliqini éytti.

« Lost <ghayib>» we «24» namliq téléwiziye tiyatirliridiki roli bilen tonulghan amérikaliq artis lana parrilla, özining türkiye we süriye xelqliri üchün dua qiliwatqanliqini eskertip mundaq dédi: «men türkiye we süriyede yüz bergen bu qorqunchluq yer tewresh apitini körüp cheksiz azab  - oqubet déngizigha chöküp kettim. hés – tuyghulirimni toluq ipadilep bérishke söz tapalmaywatimen.»

firansiyelik modél sénastiyén bétsch ammiwi ortaqlishish tor béti Instagram sehipiside élan qilghan uchurlirida, özining türkiyede tartqan foto- süretliridin sirt yene, yer tewresh apitidin kéyin tartilghan foto -süretlernimu hembehirlidi.

bétsch, egüshküchilirini «‹AHBAP› jemiyiti» ge iane qilish arqiliq süriye we türkiyediki talapetke uchrighanlargha yardem bérishke chaqirdi, hemde türkiyede yüz bergen ikki chong yer tewresh apitidin qattiq azablanghanliqini eskertip mundaq dédi: «men shundaq teleylik idimki, türkiye xelqining keng qorsaqliqigha biwasite shahit bolghan idim. hazir ularning bu keng qorsaqliqi üchün jawab qayturush bizning ixtiyarliqimizda.»

ispaniyelik muzikant énrik iglésias ammiwi ortaqlishish tor betliridiki sehipiliride, « Save The Children <balilarni qutquzush>» teshkilatining tor bétining yardem paaliyitining ulnishini  hembehirlep mundaq dédi: «türkiye we süriye hazir heqiqeten bizning yardimimizge mohtaj. eger mumkin bolsa, söygüngizni hazirning özidila izhar qiling, yardemliringizni we ianiliringizni derhal eweting.»

dunyagha dangliq ashpez jemié oliwér, özining ammiwi ortaqlishish tor betliridiki sehipiliride, türkiye we süriyede yüz bergen yer tewresh apitide talapetke uchrighanlarning derd – elemlirini ortaqlishiwatqanliqini eskertti, hemde merkizi engiliyege jaylashqan jiddiy ehwallargha taqabil turush komitéti (DEC) ning türkiye we süriye üchün yardem paaliyetlirini ishqa kirishtürgenlikini tekitlidi.

amérikaliq artis sofiye karson,  ammiwi ortaqlishish tor béti Instagram sehipiside élan qilghan birleshken döletler teshkilati balilar fondi (UNICEF) ning insanperwerlik yardem paaliyitige munasiwetlik  sinliq uchurida, türkiyediki balilarning dunyaning herqaysi jayliridin kélidighan yardemge mohtaj ikenlikini tekitlidi.