shiwétsiyede quran kerimge qarshi ighwagerchilik dawamlashmaqta
shiwétsiyening karlskrona shehirige qarashliq ronnébi nahiyesining oxshimighan jaylirida üstige we ichige haqaret yézilghan üch quran kerim tépildi.
türkiye awazi radiyosi xewiri: shiwétsiye döletlik téléwiziye qanili «SVT» ning xewiride, üstige ölüm tehditi yézilghan quran kerimning aptobus békitide tépilghanliqi, qalghan quranlarning ammiwi sorunlardin tépilghanliqi bildürüldi.
ronnébi islam jemiyitining ezasi gudlag hilmarsdottir «SVT» gha bergen bayanatida, bu weqedin intayin qayghurghanliqini we quranning hayat yétekchisi ikenlikini éytti.
ronnébida 2020 - yilidimu musulmanlar meschit süpitide ishletken binaning aldigha köydürülgen quran kerim betliri we choshqa göshliri tashlap qoyulghan idi. gerche saqchilar weqege qarita «nepret jinayiti» tekshürüshi bashlanghanliqini élan qilghan bolsimu, jinayetchiler tutulmighan idi.
bu yil (2023) 21 – yanwarda shiwétsiyening paytexti stokholmdiki türkiye elchixanisi aldida daniyelik ashqun ongchi qattiq yönilish partiyesining rehbiri rasmus paludan quran kerimni köydürgen we saqchilarning qoghdishi astida élip bérilghan paaliyet jeryanida héchkimning paludangha yéqinlishishigha yol qoyulmighan idi.
paludanning quran kerimni köydürüshi üchün shiwétsiye hökümitining ruxset bergenlikige qarita türkiye qatarliq nurghun islam döletliri naraziliq bildürgen idi.
paludan 27 - yanwardimu daniyediki bir jamening udulida, kopénhagéndiki türkiye elchixanisining aldida quran kerimni köydürgen idi.
gollandiyede «irqchi gherbning islamlishishigha qarshi turush wetenperwer yawropaliqlar herikiti (PEGIDA) ning rehbiri édwin wagénswéld lahey shehiride yalghuz qilghan paaliyitide quran kerimni yirtqan idi.
türkiye qatarliq nurghun döletler, shiwétsiye, gollandiye we daniyediki quran kerimge qilinghan hujumlargha naraziliq bildürgen idi.
