pakistan yawropa ittipaqidin keshmirge «alahide elchi» teyinlishini telep qildi

türkiye awazi radiyosi xewiri: «radiyo pakistan», azad keshmir rayoni pirézidénti sultan mehmud chawdrining bélgiyening paytexti biryusséldiki «xelqara keshmir tinchliq munbiri» yighinida, yawropa parlaménti, bélgiye kéngesh palatasi we bélgiye parlaménti ezalirigha xitab qilghanliqini xewer qildi.

xewerde körsitilishiche, chawdri jammu keshmir mesilisini tinch hel qilish üchün yawropa ittipaqidin keshmirge «alahide elchi» teyinleshni telep qilghan.

yawropa ittipaqining jammu keshmir mesilisini hel qilish we jenubiy asiyaning tinchliq we bixeterlikige kapaletlik qilishta muhim rol oynaydighanliqini otturigha qoyghan chawdri, hindistanning keshmirliklerge qaratqan bésimining kishilik hoquq depsendichilikini keltürüp chiqarghanliqini tekitligen.

chawdri hindistanning BBC ning bash ministir naréndra modi toghrisidiki höjjetlik filimini cheklishining «modining heqiqiy epti - beshirisini pütün dunyagha namayan qilghanliqi» ni ilgiri sürgen.

hindistan hökümiti bash ministir naréndra modi gujarat ölkisining bash ministiri bolghan mezgilide asasliqi musulmanlar bolup 1000 din artuq ademning jénigha zamin bolghan weqelerni téma qilghan «hindistan: modi soali» namliq höjjetlik filimning birinchi bölümige munasiwetlik barliq ijtimaiy alaqe uchurlirini meni qilghanidi.

engliye 1947-yili hindistandin chékinip, chiqidighan waqitta xanliq tüzümde bashquruluwatqan keshmirge hindistan yaki pakistangha qoshulup kétish ixtiyarliqi béridu, nopusining %90 i musulman bolghan keshmir xelqi 1947-yili pakistangha qoshulup kétish üchün meydanini bildürgen bolsimu, biraq eyni dewrdiki keshmir xani hindistangha qoshulup kétishni qarar qilidu. bu qarargha keshmir xelqi qarshi chiqidu, shu yili pakistan bilen hindistan keshmirge esker ewetip urush qilidu. 

2019-yili 8-ayning 5-küni hindistanning jammu keshmirning alahide salahiyitini bikar qilip, ölkini merkiziy hökümet qarmiqidiki ikki ittipaq rayongha ayrishi, pakistan bilen hindistan otturisidiki jiddiychilikning küchiyip kétishini keltürüp chiqarghanidi.