zélénskiy rusiyeni rozhdéstwadin ilgiri eskerlirini chékindürüshke chaqirdi

türkiye awazi radiyosi xewiri: ukraina pirézidénti wolodimir zélénskiy gérmaniye nöwetchi reis boluwatqan G7 dölet guruhi rehberlirining qatnishishi astida ötküzülgen tor yighinigha sinliq qatnashti.

u bir qanche aydin buyan rusiyege qarshi urushning dawamlishiwatqanliqini xatirilitip, ukrainagha qilinghan herbiy, sehiye, ijtimaiy we maliye yardemliri sewebidin G7 dölet guruhi döletliridin minnetdar ikenliklirini qeyt qildi.

u urush dawamlishiwatqanliqi üchün ukrainaning küchlük hemkarliqqa éhtiyajliq ikenlikini bildürüp: «hemminglardin emelge ashurulghan bu hemkarliqlarni kéler yilimu (2023) dawamlashturushunglarni soraymen. rusiye hujumlirini dawamlashturuwatidu we bu sewebtin ukrainagha qiliniwatqan yardemler dawamlishishi kérek» dédi.

u rusiyening ukrainagha sélishturghanda nurghun bashqurulidighan bomba we zembirek sistémilirigha ige ikenlikini eskertip, ukrainagha qiliniwatqan qoral-yaragh yardemlirini köpeytish kéreklikini qeyt qildi.

u rusiye armiyesining ukrainadiki achquchluq énérgiye ul-eslihelirige hujum qilip, peqet ukrainanila emes, belki yawropa döletlirinimu énérgiye apitige qarap ittirishke urunuwatqanliqini ilgiri sürdi. u mundaq dédi:

«silerni tebiiy gaz mesiliside ukrainagha qiliniwatqan yardemlerni köpeytishke teklip qilimen.»

u ukraina otturigha qoyghan tinchliq pilanining ijra qilinishi üchün xelqaraliq bir munberning ötküzülüshi kéreklikini bildürdi.

u rusiyeni mesilini konkrét hel qilish musapisi üchün zörür qedemlerni tashlashqa dewet qilip, aldimizdiki künlerde dunya miqyasida tebriklinidighan rozhdéstwa bayrimini xatiriletti we bayram künliride rusiyeni armiye qisimlirini ukrainadin chékindürüshke chaqirdi.

u rusiyege teklip qilinghan mesilini hel qilish charisi orundalghan ehwalda tinchliqni emelge ashurushning mumkin bolidighanliqigha ishinidighanliqini tekitlep, emdi moskwadin xewer kütidighanliqlirini qeyt qildi.