rusiye litwaniyelik diplomatni «qarshi élinmaydighan kishi» dep jakarlidi
rusiye litwaniyening moskwadiki elchixanisida wakaletchi diplomat bolup turuwatqan wirginia umbrasénéni «qarshi élinmaydighan kishi» dep jakarlidi.
türkiye awazi radiyosi xewiri: rusiye tashqi ishlar ministirliqi yazma bayanat élan qilip, rusiyening wilnyusta turushluq elchixanisida wakaletchi bolup ishlewatqan diplomat sérgéy riyabokonning «qarshi élinmaydighan kishi» dep élan qilinghanliqini, buning asassiz qaar ikenlikini bildürüp, bu munasiwet bilen, litwaniyening moskwadiki elchixanisining bir emeldarining ministirliqqa chaqirtilghanliqini uqturdi.
bayanatta: «elchixana xizmetchisige moskwadiki litwaniye elchixanisida wezipe ötewatqan mesul xadim umbrasénéning <qarshi élinmaydighan kishi> dep élan qilinghanliqi toghrisidiki uqturush tapshuruldi. umbraséné besh kün ichide rusiye tewelikidin chiqip kétishi kérek» dégen ibarilerge orun bérildi.
«litwaniyening rusiye bilen bolghan munasiwetni üzül-késil qalaymiqanlashturush üchün düshmenlerche siyaset yürgüzüwatqanliqi» tekitlengen bayanatta, litwaniyening paytext moskwadiki medeniyet merkizining paaliyetlirining tonglitilghanliqigha isharet qilindi.
bayanatta yene, wilnyusning kelgüsidiki «dostane bolmighan» qedemlirige qarshi qoshumche tedbirlerning yolgha qoyulidighanliqi otturigha qoyuldi.
litwaniye, rusiyening wilnyusta turushluq elchixanisida ishlewatqan wakaletchi diplomat riyabokonni 3-noyabir «qarshi élinmaydighan kishi» dep élan qilghanidi.
