yawropa ittipaqi iran hökümitini eyiblidi

türkiye awazi radiyosi xewiri: yawropa ittipaqi irangha mahsa eminining «yaghliq chigish qaidelirige riaye qilmighanliqi» seweb körsitilip tutqun qilinghandin kéyin, jénidin ayrilishi bilen bashlanghan namayishlarni basturush üchün zorawanliq wastilirini qollanmasliqqa we xelqning intérnétqa ige bolushigha ruxset qilishqa chaqirdi.

yawropa ittipaqi tashqi munasiwetler we bixeterlik siyasiti aliy wekili josép borrél iran bixeterlik tarmaqlirining namayishni basturushta muwazinetsiz küch ishletkenlikini, weqelerde yarilinish we ölüm-yétim hadisilirining yüz bergenlikini qeyt qildi.

u intérnétni üzüwétish we uchur almashturush munberlirini chekleshning, pikir erkinlikige xilapliq qilish bolidighanliqini eskertip, yawropa ittipaqi we eza döletlerning namayishchilargha zorawanliq qilishni «qobul qilghili bolmaydu we toghra emes» dep qaraydighanliqini tekitlidi.

u: «iranning namayishlarni zorawanliq bilen basturushni derhal toxtitishini, intérnétni eslige keltürüp, uchurlarning erkin almishishigha kapaletlik qilishini ümid qilimiz. shundaqla jénidin ayrilghan we tutqun qilinghanlarning sanini élan qilishini, zorawanliq qilmighan namayishchilarni qoyuwitishini, qolgha élinghanlargha muwapiq muamile qilishinimu ümid qilimiz» dédi.

u yene, mahsa eminining ölümining tekshürülüshi kéreklikini, jawabkarlarni soraqqa tartishni telep qildi.

iran paytexti téhranda 13-séntebir (2022) «exlaq saqchiliri» dep atilidighan «irshad charlighuchiliri» teripidin tutqun qilinghandin kéyin ehwalida özgirish bolghanliqi sewebidin doxturxanigha apirilghan mahsa eminining 16-séntebirde jénidin ayrilishi, dölet miqyasida naraziliqlargha seweb bolghan idi.

mahsa eminining 17-séntebirde yurti sakkiz shehride ötküzülgen depne murasimidin kéyin bashlanghan namayishlar, qisqa waqit ichide nurghun sheherlerge kéngeygen idi.