liz trus engliyening yéngi ayal bash weziri boldi

türkiye awazi radiyosi xewiri: konsérwatiplar partiyesidiki rehberlik saylimi we rehberni wezipisidin qaldurush basquchlirigha mesul organ «1922 komitéti» ning bashliqi we parlamént ezasi sir graham bradi (Sir Graham Brady) londondiki ayal padishah 2-élizabét konférans merkizide, partiye ezaliri tashlighan awazning netijisini élan qildi.

élan qilinghan netijige asaslanghanda, liz trus 81 ming 326 awazgha, reqibi rishi sunak (Rishi Sunak) 60 ming 399 awazgha érishken. buning bilen, hakimiyet béshidiki konsérwatiplar partiyesining rehberlik riqabitide ghelbe qilghan liz trus, oxshash waqitta yene, döletning yéngi bash weziri bolush hoquqini qolgha keltürgen.

sabiq bash wezir boris jonson ete (2022-yili 6-séntebir) shotlandiyening balmoral baghchisida dem éliwatqan ayal padishah 2-élizabétqa istépasini sunidu. liz trus bolsa, ayal padishahdin yéngi hökümetni teshkillesh hoquqini tapshuruwalidu.

yéngi bash wezir liz trus ayal padishah bilen körüshkendin kéyin, londongha qaytip kélip, nutuq sözleydu. uning ete yéngi kabéntni élan qilishi kütülmekte.

sabiq bash wezir boris jonson 7-iyulda (2022) hakimiyet béshidiki konsérwatiplar partiyesining bashliqliq wezipisidin istépa bergenlikini, bash wezirlik hoquqini bolsa, yéngi rehber saylanghuche saqlap qalidighanliqini élan qilghan idi.