jenubiy koréye béyjingning yuqiri boshluq hawa mudapie sistémisi toghrisidiki telipini ret qildi
séol hökümiti, béyjingning jenubiy koréye tewelikige amérikada yasalghan bashqurulidighan bomba sistémisini orunlashturmasliq toghrisidiki chaqiriqini ret qildi.
türkiye awazi radiyosi xewiri: jenubiy koréye tashqi ishlar ministirliqi, ministir park jinning seyshenbe küni xitay tashqi ishlar ministiri wang yi bilen ötküzgen uchrishishidin kéyin yazma bayanat élan qilip, yuqiri boshluq hawa mudapie sistémisi (THAAD) ning jenubiy koréyeliklerning hayati we mal-mülüklirini qoghdashtiki bir mudapie qorali ikenlikini, séulning buni béyjing bilen söhbetlishishni xalimaydighan dölet bixeterlik mesilisi dep qaraydighanliqini uqturdi.
bayanatta, yuqiri boshluq hawa mudapie sistémisining jenubiy koréyege orunlashturulmasliqi toghrisida resmiy kélishim yaki bérilgen wedilerning yoqluqigha isharet qilinip, ikki ministirning uchrishida, tereplerning yuqiri boshluq hawa mudapie sistémisigha munasiwetlik qarashlirining perqliq ikenlikini delilligenliki, buning ikki dölet munasiwetliride chégishlik peyda qilmasliqi toghrisida birdeklik hasil qilinghanliqi tekitlendi.
xitay tashqi ishlar ministirliqi bayanatchisi wang wénbin ikki ministirning xitaydiki uchrishishidin kéyin bayanat bérip, yuqiri boshluq hawa mudapie sistémisining béyjingning istratégiyelik bixeterlik menpeetige buzghunchiliq qilghanliqini ilgiri sürüp, jenubiy koréyening yuqiri boshluq hawa mudapie sistémisi paaliyitini chekleshke wede bergenlikini bildürgenidi.
u, ikki tashqi ishlar ministirining yuqiri boshluq hawa mudapie sistémisi toghrisida chongqur pikir almashturup, meydanini aydinglashturup, özara chüshinishni kücheytkenlikini qeyt qilghanidi.
