wang yi: béyjingning amérika ottura sherqte peyda qilghan «küch boshluqi»ni toldurush niyiti yoq

türkiye awazi radiyosi xewiri: «yershari waqit géziti» ning xewirige qarighanda, xitay tashqi ishlar ministiri wang  ötken hepte dölitining sahibxanliqida pars qoltuqi hemkarliq teshkilatigha eza döletler bilen türkiye we iranliq mensepdashlirining ishtirak qilishi bilen chaqirilghan yighin toghrisida toxtalghan.

amérikaning yéqindin buyan ottura sherqtiki herbiy mewjutluqini we énérgiye sahesidiki rayongha tayinishini azaytish teshebbusidin kéyin rayonda «küch boshluqi» peyda bolghanliqi toghrisidiki qarashqa qoshulmaydighanliqini tekitlep: «biz ottura sherq xelqining rayonning xojayinliri ikenlikige ishinimiz. bu yerde héchqandaq küch boshluqi yoq, uning sirttin kelgen xojayingha éhtiyaji yoq» dégen.

u, ottura sherqning uzun tarix, özgiche medeniyiti we mol yer asti bayliqigha ige ikenlikini, shuning bilen bir waqitta, chet elning arilishishi sewebidin uzun yilliq malimanchiliq we toqunushlarning ziyankeshlikige uchrighanliqini bildürüp: «xitay ottura sherqning muqimliqi we tereqqiyatini tézlitishini her daim qollaydu» dégen.

xelqara jemiyetning ottura sherqning muqimliqigha töhpe qoshushi kéreklikini, emma mesile keltürüp chiqiridighan arilishishtin saqlinishi kéreklikini tekitligen wang, sözini dawamlashturup: «ottura sherq tereqqiyatqa mohtaj. rayondiki döletler chet el modélliridin bezi nersilerni ögense bolidu, emma ularni köchürmesliki kérek. néolibéralizm hemmila késelge payda qilidighan bir xil dora emes» dégenlerni qeyt qilghan.