iraq bash ministiri suyiqesttin salamet qutulup qaldi

türkiye awazi radiyosi xewiri: iraq hökümitige tewe bixeterlik axbarat tori teripidin élan qilinghan bayanatta, baghdat yéshil rayondiki kazimining öyining «qoralliq uchquchisiz ayropilan»ning hujumigha uchrighanliqi,  bash ministirning hujumdin yaridar bolmastin qutulup qalghanliqi we salametlikining yaxshi ikenliki bildürüldi.

bayanatta, rayondiki bixeterlik qisimlirining tedbirlerni yolgha quyushni dawamlashturiwatqanliqi eskertildi.

iraq bash ministiri tiwittér hésabida, «men yaxshi, ailemdikilerning yénidamen. köpchilikni temkin, soghuqqan bolushqa chaqirimen» dep uchur hembehirlidi.

irangha yéqinliqi bilen tonulghan fetix birleshmisi we shie hashdishshabining qollighuchiliri 10-öktebirdiki saylam netijisige étiraz bildürüp, yéshil rayon aldidiki olturuwilish namayishi dawamlashturmaqta.

5-noyabir jüme küni namayishchilar bilen bixeterlik qisimliri otturisidiki toqunushta 1 namayishchi bixeterlik qisimliri achqan oqta qaza qilghan idi. shuningdin kéyin jiddiylik kücheygen neq meydangha shie quralliq küchliri asayib ehliheq herikitining rehbiri qeys hazali yétip bérip, kazimigha qarita tehdidlerni öz ichige alghan bayanatlarni bergen idi.

hazalidin bashqa yene, fetix birleshmisining rehbiri hadi amiri we shie qoralliq küchliridin ebu ala el welayimu kazimigha we hökümtige qarita qattiq tenqidlerde bolghan  hemde amiri namayishchining öltürülüshining jazasiz qalmaydighanliqini élan qilghan idi.